އިޓާލިއަން ސެރީ އޭ ތާވަލްގެ އެއްވަނައަށް ޖެހިލަން އޭސީ މިލާނަށް ލިބުނު ފުރުޞަތަށް ހުރަސްއަޅާ, ޔުވެންޓަސް ތިންވަނަ އަށް ޖެހިލައިފިއެވެ.

މިލާންގެ ފުރުޞަތަށް ޔުވެންޓަސް އިން ހުރަސް އެޅީ 1-0 ން އޭސީ މިލާން ބަލިކޮށްގެންނެވެ. މެޗުން މޮޅުވެގެން ތާވަލްގެ އެއްވަނަ އަށް ޖެހިލަން މިލާނަށް ފުރުޞަތު އޮތަސް, ޔުވެންޓަސް ވަނީ މެޗު ކާމިޔާބުކޮށް މިލާނާ ޕޮއިންޓަކާ ކައިރިއަށް ޖެހިލާފައެވެ. ދެވަނާގައި އޭސީ މިލާން އޮތީ 21 ޕޮއިންޓާއެކުއެވެ. ޔުވެންޓަސް ތިންވަނާގައި އޮތީ 20 ޕޮއިންޓާއެކުއެވެ. 22 ޕޮއިންޓާއެކު ސެރީ އޭ ތާވަލްގެ އެއްވަނާގައި އޮތީ އިންޓަރ މިލާނެވެ.

އޭސީ މިލާންގެ ދަނޑުގައި ކުޅުނު މެޗުގެ ހަމައެކަނި ލަނޑު ޔުވެންޓަސް އަށް ކާމިޔާބުކޮށްދިނީ 62 ވަނަ މިނެޓުގައި ލޮކަޓެލީއެވެ. މެޗުގެ ފަންސާހަކަށް މިނިޓް އޭސީ މިލާނުން ކުޅުނީ ދިހަ ކުޅުންތެރިންނާއެކު އެވެ. ކުޅުންތެރިއަކު މަދުވީ މަލިކް ތިއާވޫ އަށް ސީދާ ރަތްކާޑެއް ދެއްކުމުންނެވެ. އެއީ ގޯލް ޖަހަން މޮއިސް ކީން އަށް ލިބުނު ހުސް ފުރުޞަތެއް ހުއްޓުވަން ކުރި ފައުލަކާ ގުޅިގެންނެވެ.

ދެޓީމަށްވެސް އަނިޔާއާއި ސަސްޕެންޝަންގެ މައްސަލަތައް ކުރިމަތިވެފައި އޮތް މެޗަށް މިލާނުން ނެރުނީ އެމީހުން ތިންވަނަ ކީޕަރެވެ. ނަމަވެސް 40 އަހަރުގެ އެންޓޯނިއޯ މިރާންޓޭ ވަނީ ޔުވެންޓަސްގެ ރަނގަޅު އެޓޭކްތަކެއް ހުއްޓުވާފައެވެ.