ފަލަސްތީނުގެ ރައްޔިތުންނަށް އިސްރާއީލުން ދެމުންގެންދާ ލާއިންސާނީ އަނިޔާތަކުން ފަލަސްތީނުގެ ރައްޔިތުންނަށް ނަސްރު ދެއްވުން އެދި، ރާއްޖޭގެ ހުރިހާ މިސްކިތެއްގައި ގުނޫތު ނާޒިލާ ކިޔުމަށް އިސްލާމިކް މިނިސްޓްރީން އަންގައިފިއެވެ.
ބުދަ ދުވަހު އިސްލާމިކް މިނިސްޓްރީން ނެރުނު ސަރކިއުލަރއެއްގައި ވަނީ، ފަލަސްތީނުގެ ރައްޔިތުންނަށް އިސްރާއީލުން ދެމުންގެންދާ ލާއިންސާނީ އަނިޔާތަކުން ފަލަސްތީނުގެ ރައްޔިތުންނަށް ނަސްރު ދެއްވުން އެދި، ބުދަ ދުވަހުގެ މެންދުރު ނަމާދުން ފެށިގެން ރާއްޖޭގެ ހުރިހާ މިސްކިތެއްގައި، ފަރުޟު ފަސް ނަމާދުގެ ފަހު ރަކުއަތުގެ އިއުތިދާލުގައި ގުނޫތު ނާޒިލާ ކިޔުމަށެވެ. އަދި މިނިސްޓްރީން ވަކި ގޮތަކަށް އަމަލުކުރުމަށް އަންގަންދެން އެކަން ކުރިއަށް ގެންދިއުމަށް އެ ސަރކިއުލަރގައި ވަނީ ބުނެފައެވެ.
އިސްރާއީލުގެ ޔަހޫދީންގެ ހައްދުފަހަނައަޅާފައިވާ ލާއިންސާނީ އަނިޔާތައް ދުވަހެއް ދުވަހަކަށް ވަރުގަދަކުރަމުން ގޮސް މުޅި ޣައްޒާ އެއްކޮށް ވަނީ ސުންނާފަތިކޮށްފައެވެ. އަދި މި ލާއިންސާނީ ހަމަލާތަކުގެ ސަބަބުން ޣައްޒާގެ 3000ށްވުރެ ގިނަ މީހުން ޝަހީދުވެފައި ވާއިރު، އޭގެ ތެރެއިން ދެބައިކުޅަ އެއްބަޔަށްވުރެ ގިނައީ އަންހެނުންނާއި ކުޑަކުދިންނެވެ.
