އިންޑިޔާ އާއި ޕާކިސްތާން ކްރިކެޓް ވޯލްޑްކަޕުގައި މިހާތަނަށް އެއްވެސް މެޗަކުން ޕާކިސްތާން މޮޅެއްނުވެ އެވެ. އިއްޔެ އަކީ މި ސިލްސިލާ އަށް 8 ވަނަ މެޗު އިންޑިޔާ ކޮޅަށް އެނބުރު ދުވަހެވެ. މި ފަހަރު ޕާކިސްތާން ބަލިވީ ލަދުވެތި ގޮތަކަށެވެ. އެންމެ 42 އޯވަރުގެ ތެރޭގައި ހުރިހާ ކުޅުންތެރިން ނުބައިވީ 191 ލަނޑަށެވެ. ޖަވާބުގައި އިންޑިޔާއިން ޕާކިސްތާން ބަލިކުރީ 30 އޯވަރުގެ ތެރޭގަ 192 ލަނޑު ހަދައިގެންނެވެ.

މެޗަށް ފަހު ޕާކިސްތާނުގެ ޓީމު ޑިރެކްޓަރު އަދި އޮސްޓްރޭލިޔާގެ ކުރީގެ ކޯޗު މިކާއީ އަރްތޫރަށް ގޯސްވީ އޭނާގެ ސަޕޯޓަރުން ދަނޑުގައި ނެތުމެވެ. އެއީ ތެދެކެވެ. މެޗު ކުޅުނީ ދުނިޔޭގެ އެންމެ ބޮޑު ކްރިކެޓް ސްޓޭޑިއަމް ކަމަށްވާ ނަރެންދްރާ މޯދީ ސްޓޭޑިއަމުގަ އެވެ. މި ދަނޑަށް 132000 މީހުންނަށް ވަދެވޭއިރު އިއްޔެ އެތަނުގައި ތިބި ލައްކައަކަށްވުރެ ގިނަ މީހުންނަކީ އިންޑިޔާގެ ސަޕޯޓަރުންނެވެ.

މުބާރާތް ކުޅެނީ މި ފަހަރު އިންޑިޔާގަ އެވެ. ސިޔާސީ އަރައިރުންތަކާހުރެ ޕާކިސްތާނުގެ ސަޕޯޓަރުންނަށް އިންޑިޔާ އަށް ދިއުން ފަސޭހަކަމަކަށް ނުވެ އެވެ. ނޫސްވެރިންގެ ތެރެއިން މިހާތަނަށް އިންޑިޔާ އަށް ދިއުމުގެ ހުއްދަ ލިބުނީ ދެބައިކުޅަ އެއްބައި މީހުންނަށެވެ.

އޭނާ އަދި ބުނީ މެޗު ކުޅެމުންދިޔައިރު ޕާކިސްތާނު ސަޕޯޓަރެއްގެ އަޑު އެއްގޮތަކަށް ވެސް ނީވުނު ކަމަށެވެ.

އޭނާ ބުނީ ޕާކިސްތާނުގެ ސަޕޯޓަރުންނަށް ވިސާ ނުލިބުމުގެ މައްސަލައާ މެދު ކޮމެންޓް ކޮށްފިނަމަ އޭނާ ޖޫރިމަނާކުރާނެތީވެ އެވާހަކަ އިތުރަށް ދައްކަން ބޭނުންނުވާ ކަމަށެވެ.