ރައްޔިތުންގެ މަޖިލީހުގެ ޕީޕީއެމްއަށް ނިސްބަތްވާ ހަތަރު މެންބަރެއްގެ ގޮނޑި ގެއްލިއްޖެކަމަށް އިލެކްޝަންސް ކޮމިޝަން (އީސީ) އިން ކަނޑައެޅި މައްސަލަ އިދިކޮޅު ފަރާތްތަކުން އިންޓަރ ޕާލިމެންޓަރީ ޔޫނިއަން (އައިޕީޔޫ) އަށް ހުށަހަޅައިފި އެވެ.
ގުޅިފައިވާ ސިޔާސީ ޕާޓީތަކުގެ މަޖިލިސް މެންބަރުން ބުރާސްފަތި ދުވަހު ކުނޫޒްގައި ބޭއްވި ނޫސްވެރިންގެ ބައްދަލުވުމެއްގައި ވިދާޅުވީ، އެ މައްސަލަ ސްޕްރީމް ކޯޓަށާއި އައިޕީޔޫއަށް މިހާރު ހުށައަޅާފައިވާކަމަށެެވެ.
ގޮނޑި ގެއްލިފައިވާ ކަމަށް އީސީއިން ބުދަ ދުވަހު އިއުލާން ކުރި މެންބަރުންނަކީ ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް (ވައްޑޭ) އާއި ވިލިނގިލީ ދާއިރާގެ މެމްބަރު ސައުދު ހުސެއިނާއި، މަޑުއްވަރީ ދާއިރާގެ މެމްބަރު މުހައްމަތު އަމީތު އަދި ދިއްދޫ ދާއިރާގެ މެމްބަރު އަބްދުއްލަތީފް މުހައްމަދެވެ.
އިލެކްޝަންސްސް ކޮމިޝަން (އީސީން) ވަނީ އެ ދާއިރާތަކުގައި ބައި އިލެކްޝަން ބޭއްވުމަށް ވެސް އިއުލާންކޮށްފަ އެވެ.
ހަތަރު މެންބަރުންގެ މައްސަލަ އައިޕީޔޫއަށް ހުށަހަޅާފައިވާ އިރު އެ މެންބަރުން ވަނީ ސުޕްރީމް ކޯޓަށް ވެސް އެ މައްސަލަ ހުށަހަޅާ، ގޮނޑި ނުގެއްލޭ ކަމަށް އަމުރެއް ނެރެދިނުމަށް އެދިފަ އެވެ.
އެ ހަތަރު މެންބަރުން ވަކިކޮށްފައިވާ އިރު ޕީޕީއެމްއިން އަންނަނީ އެ ޕާޓީން ވަކިވެވަޑައިގަތް އިތުރު ހަ މެންބަރެއްގެ މައްސަލަ އެ ޕާޓީގެ ސުލޫކް ކޮމީޓީން ބަލަމުންނެވެ.
