ފޭސް 3ގެ ބިން ހިއްކައި ނިމުމުން، ދިޔަނެރު ފަޅު ހިއްކުމުގެ މަސައްކަތް ބާރު ސްޕީޑްގައި ކުރިއަށްދާނެ ކަމަށް އާބަންކޯއިން ބުނެފިއެވެ.

ބިންވެރިޔާ ސްކީމުގެ ދަށުން ދޫކުރުމަށް ހަމަޖެހިފައިވާ ގޯތިތަކަށް ބޭނުންވާ ބިން ހިއްކުމަށް، ހުޅުމާލޭ ދެވަނަ ފިޔަވަހީގެ ފަޅު ހިއްކުމަށް މިހާރު ވަނީ ތައްޔާރުވެފައެވެ. މިމަސައްކަތް ކުރިއަށްދާގޮތާ ގުޅޭގޮތުން ޕްރޮޖެކްޓް މެނޭޖަރު ހުސައިން ހަނާން އަހުމަދު ވިދާޅުވީ، ފޭސް 3ގެ މަސައްކަތް ގާތްގަނޑަކަށް 6 ހަފުތާ ނުވަތަ އެއަށްވުރެވެސް އަވަހަށް ނިމޭނެ ކަމަށެވެ. އެ މަސައްކަތް ނިމުނުހާ އަވަހަށް ދިޔަނެރު ފަޅު ހިއްކުމުގެ މަސައްކަތް ކުރުމަށް ޑްރެޖަރު ގެންގޮސް، ބާރު ސްޕީޑްގައި ކުރިއަށް ގެންދާނެ ކަމަށެވެ.

ސަފާރީ ބޯޓުތަކަށް ޚާއްސަ ބަނދަރަށް ދިޔަނެރު ފަޅު ހިއްކަން ފަށާފައިވަނީ ސެޕްޓެންބަރު މަހުގެ 21ގައެވެ.

ސަފާރީ ބޯޓުތައް އަޅާނެ ވަކި ޚާއްސަ ތަނެއް ނެތުމަކީ އުޅަނދުފަހަރުގެ ވެރިކަންގެ ވަރަށް ބޮޑު ކަންބޮޑުވުމެކެވެ. އެހެންކަމުން މި މައްސަލަ ހައްލުކޮށްދޭނެ ކަމުގެ ޔަގީންކަން ސަރުކާރުން ވަނީ ދީފައެވެ.

މި މަޝްރޫއުގެ މަސައްކަތް ކުރުމަށް ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ)އާ ހަވާލުކުރީ މިދިޔަ އޮގަސްޓު މަހުގެ ތެރޭގައެވެ.

މި މަޝްރޫއުގެ ދަށުން ދިޔަނެރު ފަޅުން ޖުމްލަ 24.6 ހެކްޓަރުގެ ބިން ހިއްކާނެއެވެ.