އަންނަ އަހަރު ބާއްވާ އޭޝިއަން ކަޕް ފުޓްބޯޅަ މުބާރާތަށް 74 ރެފްރީން އޭއެފްސީން ހޮވައިފި އެވެ.

މީގެ ތެރޭގައި ހިމެނެނީ 35 ރެފްރީންނާއި 39 އެސިސްޓެންޓް ރެފްރީން އަދި ކޮންމެ މަގާމަށް ސްޓޭންޑްބައިގައި ތިބޭނެ ދެ ރެފްރީންގެ ޓީމެކެވެ.

މި ހުރިހާ ރެފްރީން ހޮވާފައިވަނީ އޭއެފްސީގެ 18 މެމްބަރު އެސޯސިއޭޝަނުންނެވެ. ރެފްރީން ހޮވުމުގައި ބަލާފައިވަނީ މެޗު ކޮންޓްރޯލް ކުރުމުގެ ގާބިލްކަމާއި އެމީހާގެ އަމިއްލަ ގާބިލްކަމާއި، ޓެކްނިކަލް މައުލޫމާތު ހުރި ވަރަކާއި ފިޒިކަލް ފިޓްނަސް އާއި މި ފަހަކަށް އައިސް ރެފްރީކަން ކޮށްފައިވާ މެޗުތަކުގެ ޕާފޯމަންސަށެވެ.

މި ފަހަރުގެ މުބާރާތަށް އޭއެފްސީންވަނީ އަންހެން ހަ ރެފްރީން ވެސް ހޮވައިފަ އެވެ. މީގެ ތެރޭގައި އެންމެ ފަހުގެ ވޯލްޑްކަޕުގައި ރެފްރީކަންކުރި ޖަޕާނުގެ ޔޮޝީމީ ޝަމަޝީތާ ވެސް ހިމެނެ އެވެ.

މި ފަހަރުގެ މުބާރާތުގައި ރެފްރީން ވީޑިއޯ އެސިސްޓެންޓް ރެފްރީ ސިސްޓަމް ފުލްކޮށް ބޭނުންކުރާނެ އެވެ.