ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތްކަމަށް ކަނޑައެޅުމަށް އަންނަ ހޯމަ ދުވަހު ބޭއްވުމަށް ހަމަޖައްސާފައިވާ ޖަލްސާ ނުބާއްވަން ނިންމާފައިވާ ކަމަށް މައުލޫމާތު ލިބިއްޖެއެވެ.
ޖަލްސާ ނުބާއްވާއިރު، އެ މައްސަލައިގައި ބަހުސް ކުރުމަށް ވަގުތު ކަނޑައެޅުމަށް ބުރާސްފަތި ދުވަހު މަޖިލީހުގެ އާއްމު ކޮމެޓީގެ ބައްދަލުވުމެއް ބޭއްވުމަށް ތާވަލް ކުރުމަށްފަހު ވަނީ ކެންސަލް ކޮށްފި އެވެ. ނަމަވެސް ހޯމަ ދުވަހުގެ ޖަލްސާ ކެންސަލުކުރިކަން ރަސްމީކޮށް އަދި ހާމަކޮށްފައެއް ނުވެއެވެ.
އާއްމު ކޮމެޓީގެ ބައްދަލުވުން ބޭއްވުމަށް ތާވަލުކޮށްފައި އޮތީ ބުރާސްފަތި ދުވަހުގެ 14:00 ތާވަލް ކޮށްފައެވެ. ނަމަވެސް އެ ބައްދަލުވުން ކެންސަލް ކުރި ވަކި ސަބަބެއް ހާމަ ކޮށްފައެއް ނުވެއެވެ.
ކޮމެޓީގެ ބައްދަލުވުން ކެންސަލް ކޮށްފައިވާއިރު، މަސީހުގެ އިތުބާރު ނެތްކަމުގެ މައްސަލައިގައި ސޮއި ކުރައްވާފައިވާ ޕީޕީއެމަށް ނިސްބަތްވާ ބައެއް މެމްބަރުން ޕީޕީއެމްގެ ދަފްތަރުން ވަކިކޮށް، މަޖިލީހުގައި އެ މެމްބަރުން ތަމްސީލް ކުރައްވާ ގޮނޑި ގެއްލުވާލުމުގެ މަސައްކަތް ޕީޕީއެމުން ދަނީ ކުރަމުންނެވެ.
ޕީޕީއެމް ޕާލަމެންޓްރީ ގްރޫޕްގެ ލީޑަރ އަހުމަދު ނިހާނު ހުސައިންމަނިކު އަންގާރަ ދުވަހުގެ ރޭ ވިދާޅުވެފައިވަނީ ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހީމާއި މަޑުއްވަރީ ދާއިރާގެ މެމްބަރު މުހައްމަދު އަމީތު އާއި ވިލިނގިލި ދާއިރާގެ މެމްބަރު ސައުދު ހުސައިންގެ އިތުރުން ދިއްދޫ ދާއިރާގެ މެމްބަރު އަބްދުއްލަތީފް މުހައްމަދު ޕީޕީއެމްގެ ދަފްތަރުން ވަކިކޮށް، މަޖިލީހުގެ އިދާރާއަށް ހުށަހަޅާފައިވާ ކަމަށެވެ.
މީގެއިތުރުން މަސީހުގެ އިތުބާރު ނެތްކަމުގެ މައްސަލައިގައި ސޮއިކުރައްވާފައިވާ އިސްދޫ ދާއިރާގެ މެމްބަރު އަހުމަދު ރަޝީދުގެ ސޮއި ވަނީ އަނބުރާ ނަންގަވާފަ އެވެ.
