އަނިޔާގެ ސަބަބުން ނުކުޅެހުރި ވިކެޓް ކީޕަރު ކޭއެލް ރާހުލް ވޯލްޑްކަޕަށް ދާ އިންޑިޔާގެ ކްރިކެޓް ޓީމުގައި ހިމަނައިފި އެވެ.

އަންނަ މަހު އިންޑިޔާގައި ފަށާ މުބާރާތުގައި ކުޅޭ ޓީމުގައި އޭނާ ހިމަނާފައިވަނީ ފަޔަށް ލިބުނު އަނިޔާގެ ސަބަބުން މިދިޔަ ހަތަރު މަސްދުވަހު ނުކުޅެ ހުއްޓަ އެވެ.

ނަމަވެސް 31 އަހަރުގެ ކުޅުންތެރިޔާ މިހާރު ވަނީ އަލުން ފިޓްވެ، އޭޝިޔާ ކަޕުގައި ކުޅޭ އިންޑިޔާގެ ޓީމާ ގުޅުމަށް ތައްޔާރުވަމުންނެވެ.

ރާހުލް ޓީމަށް ނެގިއިރު އޭނާއާ ވާދަކުރާނީ މިވަގުތު ޓީމުގައި އެއްވަނަ ވިކެޓް ކީޕަރަކަށް ކުޅެމުން އަންނަ އިޝާން ކިޝާން އެވެ. އޭނާ ވަނީ އޭޝިޔާ ކަޕުގައި ޕާކިސްތާނާ ދެކޮޅަށް 82 ލަނޑު ހަދައިފަ އެވެ.

އިންޑިޔާގެ ކެޕްޓަން ރޯހިތް ޝަރުމާ ބުނީ މުހިންމު ކުޅުންތެރިން ޓީމާ ގުޅުމަކީ ރަނގަޅެއް ކަމަށާއި ޓީމުގެ ފުރަތަމަ 11 ނަގާނީ ހުރިހާ ކުޅުންތެރިން އިވެލުއޭޓް ކުރުމަށްފަހު އެންމެ ފިޓް ކުޅުންތެރިން ބަލައިގެން ކަމަށެވެ.

އިންޑިޔާއިން މަސައްކަތް ކުރަމުންދަނީ މި އަހަރުގެ ވޯލްޑްކަޕް ކާމިޔާބު ކުރުމަށެވެ.