ރައްޔިތުންގެ މަޖިލީހުގެ ރައީސް އަބްދުﷲ މަސީހްގެ އިތުބާރު ނެތްކަމުގެ މައްސަލަ ހުށަހެޅުމަށް ސޮއި ކުރެއްވި ޕީޕީއެމްގެ މެމްބަރުންނަށް ސޮއި އަނބުރާ ގެނައުމުގެ ފުރުސަތު އަދިވެސް އެބަ އޮތް ކަމަށް އެ ޕާޓީގެ ޕާލަމެންޓްރީ ގްރޫޕްގެ ލީޑަރު އަހްމަދު ނިހާން ހުސެއިން މަނިކު ވިދާޅުވެއްޖެ އެވެ.
އަންގާރަ ދުވަހުގެ ރޭ ޕީޕީއެމްގެ ކައުންސިލް ބައްދަލުވުމަކަށް ފަހު ނޫސްވެރިންނާ ބައްދަލު ކުރައްވާ ނިހާން ވިދާޅުވީ މަޖިލީހުގެ ރައީސްގެ އިތުބާރު ނެތް ކަމުގެ މައްސަލާގައި ސޮއި ކުރެއްވި ބައެއް މެމްބަރުން ސޮއި އަނބުރާ ގެންނަވާނެ ކަމަށްވެސް ގަބޫލު ކުރެއްވޭ ކަމަށެވެ.
މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ހުށަހެޅުމަށް ސޮއި ކުރެއްވި މެމްބަރުންގެ ތެރޭގައި ޕީޕީއެމްގެ ކައުންސިލްގައި ހިމެނިވަޑައިގަންނަވާ މެމްބަރުންވެސް ހިމެނެ އެވެ.
މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ހުށަހަޅަން ސޮއި ކުރެއްވި މެމްބަރުން ސޮއި އަނބުރާ ގެނައުމަށް އެދިވަޑައިގެން ރައީސް އަބްދުﷲ ޔާމިން މެމްބަރުންނަށް ގުޅުއްވައިގެން ވާހަކަ ދައްކަވާ ކަމަށްވެސް ނިހާން ވިދާޅުވި އެވެ.
ނިހާން ވިދާޅުވީ ޕީޕީއެމް ޕީޖީ ގުރޫޕްގައި ހިތްހަމަ ނުޖެހޭ ކަމެއް ހުރި ނަމަ ރަނގަޅު ކުރައްވަން ތައްޔާރަށް ހުންނެވި ކަމަށާއި ގަވައިދަށް ގެންނާން ޖެހެނު ބަދަލެއް ގެންނަން ޖެހުނަސް އެކަން ވެސް ކުރައްވަން ތައްޔާރަށް ހުންނެވި ކަމަށެވެ. މީގެ އިތުރުން ނިހާން ވިދާޅުވީ މަގާމުން އެއް ފަރާތަށް ޖެހިވަޑައިގަންނަވަން ޖެހޭނަމަ އެކަން ކުރައްވައިގެން ޕީޕީއެމް ޕީޖީ ގުރޫޕްގެ މައްސަލަތައް ހައްލު ކުރައްވަން ތައްޔާރަށް ހުންނެވި ކަމަށެވެ.
އޭގެ އިތުރުން ޕީޕީއެމްއިން ދުރަށް ޖެހުނު މެމްބަރުނަށް އަލުން މަރުހަބާ ކިޔުމަށް ސަރުކާރުވެސް އޮތީ ތައްޔާރަށް ކަމަށް އޭނާ ވިދާޅުވި އެވެ.
"ސަރުކާރުވެސް އޮތީ ތިޔަ ބޭފުޅުނަށް (ޕީޕީއެމް ދޫކޮށްދިޔަ މެމްބަރުންނަށް) މަރުހަބާ ކިޔަން. ބަގަލް ގީރު ސަލާން ކޮށްގެންވެސް ގެންނަ ގޮތައް، އެއީ އަރަބިން ކުރާ މި ކުރާ ސަލާމް، ކޮނޑާ ގޮނޑު ޖައްސާ، އެއަށް އާންމުކޮށް ކިޔަނީ ގަބަރުގީރު ސަލާމް. އެގޮތައް ތައްޔާރަށް ތިބި ވާހަކަ ދަންނަވާލަން،" ނިހާން ވިދާޅުވި އެވެ.
ޕީޕީއެމް އާ ދުރަށް ޖެހިވަޑައިގެން މެމްބަރުން އަލުން ޕާޓީއާ ނުގުޅޭނެ ކަމަށް ދަންނަވަން ނޭނގޭ ކަމަށާއި އޭނާވެސް ޕީޕީއެމް ދޫކޮށް ދާން ނުދާނެ ކަމެއްވެސް ނޭނގޭ ކަމަށްވެސް ވިދާޅުވި އެވެ.
ނިހާން ވިދާޅުވީ ހޯމަ ދުވަހު އޮންނަ ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ އެޖެންޑާ ކޮށްފައި އޮތް އެ މައްސަލަ ހުށަހެޅުމަށް ސޮއި ކުރެއްވި މެމްބަރުންގެ ތެރެއިން ބައެއް މެމްބަރުން ސޮއި އަނބުރާ ގެންދެވައިފި ނަމަ އެދުވަހުގެ ރިޔާސަތު ބަލަހައްޓަވާނީ މަސީހް ކަމަށެވެ. އަދި އެދުވަހު މަޖިލީހުގައި ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ނޯންނާނެ ކަމަށް އޭނާ ވިދާޅުވި އެވެ.
