ކޮރަޕްޝަންގެ މައްސަލައެއްގައި ތިން އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ޕާކިސްތާންގެ ކުރީގެ ބޮޑުވަޒީރު އިމްރާން ޚާންގެ ޖަލު ހުކުމް އެގައުމުގެ ހައިކޯޓުން ސަސްޕެންޑުކޮށްފިއެވެ. އުމުރުފުޅުން 70 އަހަރުގެ އިމްރާންގެ މައްޗަށް ހުކުމް އިއްވާފައިވަނީ މި އޮގަސްޓް މަހުގެ 5 ވަނަ ދުވަހުއެވެ.
އިމްރާން ޚާންގެ މައްޗަށް ދައުވާ ކުރެވުނީ ބޮޑުވަޒީރުކަމުގައި ހުންނެވިއިރު ބޭރުގެ ބައެއް ގައުމުތަކުން ދިން ބައެއް ހަދިޔާ އޭނާ ބޭނުންކުރެއްވި ކަމުގެ ތުހުމަތުގައެވެ. އެމައްސަލަ މިހާރު އިސްތިއުނާފް ކުރުމަށް ހުށަހަޅާފައިވާއިރު، ހައިކޯޓުން ކަފާލާތު ބަހައްޓައި، ހުކުމް ސަސްޕެންޑްކޮށްފައި ވަނީ އިސްނިއުނާފް މައްސަލަ ނިމެންދެންނެވެ.
އަނެއްކޮޅުން ޚަބަރު ލިބޭގޮތުގައި އިމްރާން ޚާނާ ދެކޮޅަށް އުފުލާފައިވާ އެހެން މައްސަލައެއްވެސް އޮތުމާއެކު، ބުދަދުވަހާ ހަމަޔަށް އޭނާ ބަންދުގައި ބަހައްޓައިދިނުމަށް އެހެން ކޯޓަކުން އެދިފައިވާކަމަށް ޚަބަރުތައް ބުނެއެވެ.
އިމްރާން ޚާންގެ ލޯޔަރުން ބުނާގޮތުގައި، އިތުބާރު ނެތްކަމުގެ ވޯޓެއް ނަގައި މިދިޔަ އަހަރުގެ އެޕްރިލް މަހު މަގާމުން ވަކިކުރިފަހުން އޭނާއާ ދެކޮޅަށް ސަތޭކައަށްވުރެ ގިނަ މައްސަލަ ވަނީ ކޯޓަށް ހުށަހަޅާފައެވެ.
އިމްރާން ޚާންވަނީ އޭނާ ކުށެއް ނުކުރައްވާ ކަމަށާއި މިއީ ހައްތަހާވެސް ސިޔާސީ މަގްސަދުގައި ކުރާ ދައުވާތަކެއް ކަމަށް ވިދާޅުވެފައެވެ.
