ފުރާނައަށް ނުރައްކާ ވެދާނެ ކަމުގެ ބިރު އޮތްވައި، ކުރީގެ ނައިބު ރައީސް އަހުމަދު އަދީބު ހަގީގަތް ހާމަކުރައްވަމުން އެ ގެންދަވަނީ ހިތްވަރު ހުރުމުން ކަމަށް އެމަނިކުފާނުގެ ގާނޫނީ ވަކީލް މަހުފޫޒް ސައީދު ވިދާޅުވެއްޖެ އެވެ.
މަހުފޫޒް ވިދާޅުވީ އަދީބު ހާމަކުރެއްވި ހަގީގަތް ހާމަކުރެވޭނެ މީހުން ސަރުކާރާއި ދުރުގައި މިހާރުވެސް އެބަ ތިބި ކަމަށެވެ. ނަމަވެސް، ވާހަކަ ނުދައްކާ ތިބެނީ ހިތްވަރެއް ނެތުމުން ކަމަށް މަހުފޫޒް ވިދާޅުވި އެވެ.
Jalugai ove, furaanayah nurakka vedhaane kamuge biru ove, haqeeqaiy haama kuramun e gendhanee hiyyvaru hureema.
— Mahfooz Saeed (@MahfuzSayd) July 17, 2017
ނަމަވެސް، ޖަލުގައި އޮންނަވައިގެން، ފުރާނައަސް ނުރައްކާވެދާނެކަމުގެ ބިރު ވެސް އޮތްވައި އަދީބު ހަގީގަތް ހާމަކުރައްވަނީ އެމަނިކުފާނުގެ ހިތްވަރު ހުރުމުން ކަމަށް މަހުފޫޒް ވިދާޅުވި އެވެ.
Adeeb e haama kuri haqeeqaiy haama kureveyne meehun sarukaaraa dhuruga mihaaru ves eba thibi. Vaahaka nudhakkanee hiyvareh netheema.
— Mahfooz Saeed (@MahfuzSayd) July 17, 2017
އަދީބު ވަނީ ރައީސް މުހައްމަދު ނަޝީދުގެ މައްޗަށް އިއްވުނު 13 އަހަރުގެ ޖަލު ހުކުމާއި، ކުރީގެ ޑިފެންސް މިނިސްޓަރު މުހައްމަދު ނާޒިމްގެ މައްޗަށް އިއްވި 11 އަހަރުގެ ޖަލު ހުކުމުގެ މައްސަލައާ ގުޅިގެން ސުޕްރީމް ކޯޓަށް ދެ ސިޓީއެއް ހުށަހަޅުއްވާފަ އެވެ.
އަދީބު ވިދާޅުވެފައިވާ ގޮތުގައި ރައީސް ނަޝީދުގެ މައްޗަށް ކޮށްފައިވާ ހުކުމަކީ އެ މައްސަލަ ބެއްލެވި ފަނޑިޔާރުންނަށާއި، މުޅި އަދުލު އިންސާފުގެ ދާއިރާއަށް ނުފޫޒު ފޯރުވައިގެން ކޮށްފައިވާ ހުކުމެއްކަން ސާބިތުވާނޭ މައުލޫމާތު އެމަނިކުފާނުގެ އަތްޕުޅުގައި އެބަހުރި ކަމަށެވެ. އަދި އެކަމާ ގުޅޭގޮތުން ހާމަކުރެއްވުމަށް ފުރުސަތު ދީފިނަމަ ސުޕްރީމް ކޯޓުގައި އެކަން ސާބިތުވާނޭ މިންވަރަށް މައުލޫމާތު ހުށަހެޅުމަށް ތައްޔާރަށް ހުންނެވި ކަމަށް އަދީބު ވިދާޅުވެފައިވެ އެވެ.
އަދީބު ވިދާޅުވީ ރައީސް ނަޝީދުގެ މައްޗަށް ކުރެވުނު ހުކުރުމަކީ ޝަރުއީ ކޯޓެއްގެ ފަނޑިޔާރަކު ލިޔުނު ހުކުމެއް ނޫން ކަމަށެވެ. ހުކުމް ލިޔުނު ފަރާތް ވެސް އެނގިވަޑައިގަންނަވާ ކަމަށް ފާހަގަކުރައްވަމުން އަދީބު ވިދާޅުވީ ރައީސް ނަޝީދުގެ މައްސަލައިގައި "ފުރަތަމަ ޑްރާފްޓް ކުރެވުނު" ހުކުމުގައި އޮތީ އެމަނިކުފާނަށް 10 އަހަރު ދުވަހުގެ ޖަލު ހުކުމެއްކޮށް، ހުކުމް ތަންފީޒް ކުރުން 3 އަހަރު ދުވަހުގެ މުއްދަތަކަށް ފަސްކުރާ ގޮތަށް ކަމަށެވެ. ނަމަވެސް، އެ ހުކުމުގެ ލިޔުމަށް ބަދަލު ގެނައީ ކޮންފަރާތެއްގެ އަމުރަށް ކޮން ފަރާތަކުން ކަންވެސް އެނގިވަޑައިގަންނަވާ ކަމަށް އަދީބު ވިދާޅުވެފައިވެ އެވެ.
ރައީސް ނަޝީދުގެ ހުކުމާ ގުޅޭގޮތުން ސުޕްރީމް ކޯޓަށް އަދީބު ސިޓީއެއް ފޮނުއްވިއިރު، ކުރީގެ ޑިފެންސް މިނިސްޓަރު މުހައްމަދު ނާޒިމްގެ އެޕާޓްމެންޓުން ފެނުނު ފިސްތޯލައާ ގުޅޭ ގޮތުން ވެސް އަދީބު ވަނީ ސުޕްރީމް ކޯޓަށް ސިޓީއެއް ފޮނުއްވާފަ އެވެ. އެ ސިޓީގައި ވިދާޅުވެފައިވަނީ އެ ފިސްތޯލައާ ގުޅޭ އެއްވެސް މައުލޫމާތެއް ނާޒިމަށް އެނގިވަޑައިނުގަންނަވާނެ ކަމަށާއި އެކަމާ ގުޅޭ ފުރިހަމަ މައުލޫމާތު އެބަހުރި ކަމަށެވެ. އަދި ފުރުސަތު ދެއްވައިފިނަމަ ނާޒިމްގެ މައްސަލައިގައި ކަންހިނގައިދިޔަ ގޮތް ސުޕްރީމް ކޯޓުގައި ކިޔައި ދެއްވާނެ ކަމަށް އަދީބު ވިދާޅުވެފައިވެ އެވެ.
މީގެ އިތުރުން، އަދީބު ނެރުއްވި ބަޔާނެއްގައި ވަނީ އެމްއެމްޕީއާރްސީއިން ލިބުނު ފައިސާގެ ތަފްސީލްތަކާއި ގުޅޭ މައުލޫމާތު ހާމަކުރައްވާފަ އެވެ. އަދީބު ވިދާޅުވެފައިވާ ގޮތުގައި އެ ފައިސާ ހަވާލުކޮށްފައިވަނީ ސީދާ ރައީސް ޔާމީނެވެ.
