އާލާސްކަންފުޅާ އުޅުއްވާ ސުޕްރީމް ކޯޓުގެ ފަނޑިޔާރު އަލީ ހަމީދު، އިތުރު ފަރުވާއަށް ރާއްޖެއިން ބޭރަށް ވަޑައިގަންނަވައިފި އެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި އަލީ ހަމީދު ރާއްޖެއިން ބޭރަށް ވަޑައިގެންނެވީ މިއަދު އެވެ. މައުލޫމާތު ލިބިފައިވާ ގޮތުގައި އަލީ ހަމީދު އިތުރު ފަރުވާ ހޯއްދަވަން ހަމަޖެހިފައިވަނީ ތައިލޭންޑްގެ ވެރިރަށް، ބޭންކޮކް އިންނެވެ.
ސުޕްރީމް ކޯޓުގައި ހުންނަވަނިކޮށް ސްޓްރޯކެއް ޖެހިވަޑައިގަތުމުގެ ސަބަބުން އައިޖީއެމްއެޗް ގައި އަލީ ހަމީދު އެޑްމިޓް ކޮށްފައިވަނީ މިމަހުގެ ހަ ވަނަ ދުވަހު އެވެ. 10 ދުވަސް ވަންދެން އެޑްމިޓް ކޮށްގެން ފަރުވާ ދިނުމަށް ފަހު އައިޖީއެމްއެޗް އިން އަލީ ހަމީދު ދޫކޮށްލާފައިވަނީ އާދިއްތަ ދުވަހު އެވެ.
އައިޖީއެމްއެޗްގައި އެޑްމިޓްކޮށްގެން އަލީ ހަމީދަށް ދިން ފަރުވާއާ ގުޅޭ ގޮތުން އެ ހޮސްޕިޓަލުން އެއްވެސް މައުލޫމާތެއް ހާމައެއް ނުކުރެ އެވެ.
އައިޖީއެމްއެޗްގައި އެޑްމިޓް ކޮށްގެން ފަރުވާ ދެމުންދަނިކޮށް، ޖުޑިޝަލް ސާވިސް ކޮމިޝަނުން އަލީ ހަމީދު ވަނީ ވަކިކުރައްވާފަ އެވެ. އެ ކޮމިޝަނުގެ ރައީސްގެ މަގާމުގައި ހުންނެވި އަލީ ހަމީދު ކޮމިޝަނުން ވަކިކޮށް، އަލީ ހަމީދުގެ މަގާމަށް ސުޕްރީމް ކޯޓުގެ ފަނޑިޔާރު އަބްދުﷲ އަރީފް ވަނީ އައްޔަން ކުރައްވާފަ އެވެ.
