ގޯލްކީޕަރު ތިބައޫ ކޯޓުއާ އަށް އަނިޔާވެ، ސްޕޭނުގެ ރެއާލް މެޑްރިޑް ވަރަށް ބޮޑު ހާސްކަމެއްގެ ތެރެއަށް ވެއްޓިއްޖެ އެވެ.
އައު ފުޓްބޯޅަ ސީޒަން ފަށަން ދެތިން ދުވަހަށްވެފައިވަނިކޮށް ކޯޓުއާގެ ކަކުލަށް އަނިޔާވީ ޕްރެކްޓިހުގަ އެވެ. އަދި މި އަނިޔާގެ ސަބަބުން ސީޒަނުގެ ބޮޑުބައެއްގައި އޭނާ އަށް ނުކުޅެވޭނެކަން ރެއާލް މެޑްރިޑުން ވަނީ ޔަގީންކޮށްދީފަ އެވެ. ސަބަބަކީ އަނިޔާ މުޅިން ރަނގަޅު ކުރެވޭނީ ކަކޫ އޮޕަރޭޝަން ކޮށްގެން ކަމަށްވާތީ އެވެ.
2018 ވަނަ އަހަރުގެ ވޯލްޑްކަޕުގެ އެންމެ މޮޅު ގޯލްކީޕަރުގެ މަގާމު ވެސް ހޯދި ކޯޓުއާގެ އަކީ ދުނިޔޭގައި މިވަގުތުހުރި އެންމެ މޮޅު އެއް ކީޕަރެވެ. ރެއާލް މެޑްރިޑުން އެންމެ ކަންބޮޑުވަނީ އޭނާ ފަދަ ދެ ވަނަ ކީޕަރަކު ނެތުމުންނެވެ. އަދި ސީޒަން ފަށަން ކުޑަތަންވުމުންނާއެކު މިވަގުތު ފަސޭހަ އަގެއްގައި މޮޅު ކީޕަރަކު ގަނެވެން ނެތުމުންނެވެ.
އެތްލެޓިކޯ މެޑްރިޑާއި ޗެލްސީ އަށް ކުޅުމަށްފަހު 2018 ވަނަ އަހަރު ރެއާލް އަށް ބަދަލުވުމަށްފަހު ބެލްޖިއަމްގެ ކީޕަރު ކޯޓުއާ ވަނީ ފާއިތުވެދިޔަ ފަސް ސީޒަނުގައި ރެއާލްގައި މޮޅަށް ކުޅެފަ އެވެ. މިހާތަނަށް އޭނާ ވަނީ 230 މެޗު ކުޅެދީފަ އެވެ.
