ދައުލަތަށް ޚިދުމަތްކުރާ މުއްދަތު ބެލުމަށްފަހު, ދަރިވަރުންނަށް ދޫކުރާ ލޯނު އަނބުރާ ދައްކަން އޮންނަ މިންވަރު މައާފުކުރެވޭ އުސޫލެއް އެކުލަވާލައްވާނެ ކަމަށް، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.

ބުދަ ދުވަހު ދުވަހު ގދ. ވާދޫގައި ބޭއްވި "އުފާވެރި އަމާން ރާއްޖެ" ކެމްޕޭނު ބަނދަރު ބައްދަލުވުމުއި ވާހަކަފުޅުދައްކަވަމުން ރައީސް ވިދާޅުވީ ރާއްޖެ އެޑިޔުކޭޝަނަލް ޓޫރިޒަމަށްވެސް މަގުބޫލު ގައުމަކަށް ހެދުމަށް މަސައްކަތް ކުރައްވާނެ ކަމަށާއި، ފަތުރުވެރިކަމުގެ ސިނާއަތުގެ މަސައްކަތްތެރިން އިސް ސަފަށް ގެންދިއުމަށް ބޭނުންވާ ހުނަރާއި ތައުލީމު ފޯރުކޮށްދެއްވާނެ ކަމަށެވެ. އަދި ދުނިޔޭގެ ނަން މަޝްހޫރު ހޮސްޕިޓާލިޓީ ސްކޫލުގެ ކެމްޕަސްވެސް ރާއްޖޭގައި ގާއިމްކުރައްވާނެ ކަމަށް ރައީސް ވިދާޅުވިއެވެ.

ތައުލީމަށް ކުރައްވަމުން ގެންދަވާ ޚަރަދުތަކަށް އިޝާރާތް ކުރައްވައި ރައީސް ވިދާޅުވީ، 16 އަހަރާއި 18 އަހަރުގެ ކުދިންނަށް އަމާޒުކޮށްގެން ޚާއްސަ ކެރިއަރ ގައިޑެންސް ސެޝަނެއް ތައާރަފްކުރައްވައި، ތައުލީމާއި ތަމްރީން ހޯދުމުގައި, ވަޒީފާގެ ބާޒާރަށް ކުދިން ތައްޔާރުކޮށްދެއްވާނެ ކަމަށެވެ. ރައީސް ސާލިހު ވިދާޅުވީ ކަނޑައެޅޭ މިންގަނޑެއްގެ ތެރެއިން، ލޯނު ދައްކަން އޮންނަ މިންވަރެއް މައާފް ކޮށްދެއްވާނެ ކަމަށާއި، މިއީ ދައުލަތަށް ޚިދުމަތް ކުރުމުގެ މިންވަރަށް ބެލުމަށްފަހު، އަނބުރާ ދައްކަން އޮންނަ މިންވަރެއް މައާފްކުރެވޭ އުސޫލަކަށް ވާނެކަމަށެވެ. އަދި ވިދާޅުވީ ސްޓޫޑެންޓް ލޯނު އަނބުރާ ދެއްކުމަށް ދޭ މުއްދަތަށްވެސް ހެޔޮ ބަދަލުތަކެއް އަންނާނެ ކަމަށެވެ.

ސަރުކާރުން ދަނީ ތަރައްގީގެ މަޝްރުއޫތައް ކުރިއަށް ގެންދިއުމުގެ އިތުރުން، މީހުން ބިނާކުރުމުގެ މަސައްކަތް ކުރަމުންނެވެ.