އިންޑިޔާގެ މިހާރުގެ ކްރިކެޓް ކެޕްޓަން ރޯހިތް ޝަރުމާއަކީ މޮޅު ކެޕްޓަނެއް ކަމަށާއި ނަމަވެސް ވޯލްޑްކަޕް ކާމިޔާބުކުރުމަށް އޭނާ އަށް ރަނގަޅު ޓީމެއް ބޭނުންވާ ކަމަށް އިންޑިޔާގެ ކްރިކެޓް ލެގެންޓް ޔުވަރާޖް ސިންގް ބުނެފި އެވެ.
2011 ވަނަ އަހަރުގެ ވޯލްޑްކަޕް އިންޑިޔާ އަށް ހޯދައިދިން ޓީމުގެ މުހިންމު ދައުރެއް އަދާކުރި ޔުވަރާޖް ބުނީ އަމިއްލަ ގައުމުގައި އަންނަ އޮކްޓޫބަރު މަހު ވޯލްޑްކަޕް ބާއްވާއިރު ކެޕްޓަންގެ މޮޅުކަން ފެންނާނީ މޮޅު ޓީމެއް ވެސް އޮވެގެން ކަމަށެވެ. އަދި 2011 ވަނަ އަހަރު ކެޕްޓަން މަހެންދްރް ސިންގް ދޯނީއަށް ލިބުނީ މޮޅު ޓީމެއް ކަމަށެވެ.
"އެއިރު ދޯނީ އަކީ މޮޅު ލީޑަރެއް. އޭނާއާއެކު ސަޗިން ޓެންޑުލްކަރު، ޒަހީރްހާން، ވިރެންދްރާ ސިންގް، ހަރްބަޖާން ސިންގް. މިއެންމެނަކީ ވެސް ތަޖުރިބާކާރު މޮޅު ކުޅުންތެރިން. އެފަހަރުގެ ކާމިޔާބީގެ އަސްލަކީ މިއީ،"ޔުވަރާޖް ބުންޏެވެ.
އޭނާ ބުނީ މިހާރުގެ ކެޕްޓަން ރޯހިތް ޝަރުމާއަކީ ވެސް މޮޅު ކެޕްޓަނެއް ކަމަށާއި ނަމަވެސް ވޯލްޑްކަޕް ކާމިޔާބުކުރުމަށް ޓީމު ވަރުގަދަވާންޖެހޭ ކަމަށެވެ.
"އޭނާ އަށް މޮޅު ޓީމެއް ދޭން ޖެހޭ. މިހާރުގެ ޓީމަށް ބަލާއިރު ރޯހިތް ޝަރުމާ އާއި ވިރާތްކޯލީ ގަސްޕްރިޓް ބުމްރާ އާއި ކޭއެލް ރާހުލް އަދި މުހައްމަދު ޝާމީ އަކީ ވޯލްޑްކަޕް ކުޅެފައިތިބި ތަޖުރިބާކާރު ކުޅުންތެރިން. އަދި އިންޑިޔާގައި އެބަތިބި ވަރަށް ޒުވާން ހުނަރުވެރިން ވެސް. އޭގެ ތެރެއިން ބައެއް ކުޅުންތެރިން އެކަނި މަސައްކަތުން މެޗެއް ކާމިޔާބުކޮށްފާނެ،"ޔުވަރާޖް ބުންޏެވެ.
ނަމަވެސް މައްސަލައަކީ ގާތްގާތުގައި އަނިޔާގެ މައްސަލަދިމާވުން ކަމަށާއި މުޅި ޓީމު ފިޓްކޮށް އޮތުމުގެ މުހިންމުކަން އޭނާ ފާހަގަކުރި އެވެ. ޔުވަރާޖް ބުނީ 10 އަހަރު މުހިންމު މުބާރާތެއްގެ ތަށި ނުލިބި އިންޑިޔާ އޮތުމަކީ އޭނާ އަށް ގަބޫލުކުރަންދަތި ކަމެއް ކަމަށެވެ.
