ނިއުކާސަލް ޔުނައިޓެޑުން ލެސްޓާ ސިޓީގެ ހާވީ ބާންސް 38 މިލިއަން ޕައުންޑްގެ ފީއަކަށް ސޮއިކޮށްފިއެވެ.
އިންގްލެންޑު ޓީމަށް އެއް ފަހަރު ކުޅެފައިވާ އުމުރުން 25 އަހަރުގެ ފޯވާޑް ވަނީ ނިއުކާސަލްއާ އެކު ފަސް އަހަރުގެ އެއްބަސްވުމެއްގައި ސޮއިކޮށްފައެވެ. އޭނާ އަކީ މި ހޫނުމޫސުމުގައި ނިއުކާސަލްއިން ސޮއިކުރި ތިންވަނަ ކުޅުންތެރިޔާއެވެ.
ބާންސް ބުނީ، ނިއުކާސަލްއާ ގުޅުމަކީ އޭނާ ކުރިޔަށް ދިއުމަށް ލިބުނު ރަނގަޅު ފުރުސަތެއް ކަމަށެވެ. ނިއުކާސަލް މިދިޔަ ސީޒަން ނިންމާލީ ތާވަލުގެ ހަތަރު ވަނައިގައެވެ. މިއާއެކު، އަންނަ ސީޒަނުގެ ޗެމްޕިއަންސް ލީގުގައި އެ ޓީމު ކުޅޭނެއެވެ.
ނިއުކާސަލްގެ ކޯޗު އެދީ ހޯވް ބުނީ، ބާންސް އަކީ ކުރިންވެސް އޭނާ އަށް ވަރަށް ކަމުދާ ކުޅުންތެރިއެއް ކަމަށެވެ. އަދި ބާންސް އަކީ ވަރުގަދަ، ހަލުވި އަދި ހުނަރުވެރި ކުޅުންތެރިއެއް ކަމަށެވެ.
ޕްރިމިއަރ ލީގުން ރެލިގޭޓްވުމުން ލެސްޓާ ދޫކޮށްލި އެންމެ ފަހުގެ ކުޅުންތެރިޔަކީ ބާންސް އެވެ.
