ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ކުރިއަށް އޮތް ދައުރަށް އިންތިޚާބުކުރަން ޖެހޭ ކަމަށާއި، އެ ދައުރު ގެއްލިއްޖެނަމަ މިހާރު ކުރިއަށްދާ ތަރައްގީގެ މަޝްރޫއުތައް ހުއްޓޭނެ ކަމަށް އެމްއެމްޕީއާރްސީގެ މެނޭޖިންގ ޑިރެކްޓަރު ތޮއްޔިބު މުހައްމަދު ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން ތޮއްޔިބު ވިދާޅުވީ ކޮވިޑް-19އާއި ގުޅިގެން ރާއްޖެއިން އެޅި ހަރުދަނާ ފިޔަވަޅުތަކާއި، މިއަދު ރާއްޖެ ދެކޭ ތަރައްގީއަކީ ރައީސް ޞާލިހުގެ ލިޑަރޝިޕާއެކު ރައްޔިތުންނަށް ލިބޭ ކުރިއެރުން ކަމަށެވެ. ރިޔާސީ އިންތިޚާބު ކައިރިވަމުން އަންނައިރު، މިއަދު އެންމެ ބޮޑު ޕާޓީއަކުން ނުކުންނަ އެންމެ ހަރުދަނާ ލީޑަރަކީ ރައީސް ޞާލިހު ކަމަށް އޭނާ ވިދާޅުވިއެވެ.
ތޮއްޔިބު ވިދާޅުވީ ރައީސް ސާލިހަށް ދެވަނަ ދައުރެއް ވަރަށް މުހިންމު ކަމަށާއި، މިހާރު ރާއްޖޭގެ ތަރައްގީއަށް ހިންގާ ގިނަ މަޝްރޫއުތަކަކީ ދުރުމުސްތަގުބަލަށް ވިސްނައިގެން ކުރިއަށް ގެންދާ މަޝްރޫއުތަކެއް ކަމަށެވެ. ނަމަވެސް ދެވަނަ ދައުރުގައި ރައީސް ސާލިހަށް ކާމިޔާބު ނުކުރެވިއްޖެނަމަ އެ މަޝްރޫއުތައް ހުއްޓިގެންދާނެ ކަމަށް ތޮއްޔިބު ވިދާޅުވިއެވެ. އަދި ވިދާޅުވީ ދަރިންގެ ކުރިމަގާއި މުސްތަގުބަލަށްޓަކައި ރައީސް ޞާލިހަށް ދެވަނަ ދައުރެއް ދޭން ޖެހޭ ކަމަށެވެ.
މީގެ އިތުރުން ތޮއްޔިބު ވިދާޅުވީ ދެވަނަ ދައުރެއް ރައީސް ސާލިހަށް ލިބިއްޖެނަމަ، ރާއްޖެ ނުދެކޭފަދަ ވަރުގަދަ ރާއްޖެއެއް އުފެދިގެންދާނެ ކަމަށެވެ.
ކުރިމަގަށް ބަލާއިރުގަ އަޅުގަނޑުގެ ދަރިއަކަށް އަޅުގަނޑުގެ އާއިލާއަކަށް ރައްޔިތަކަށް ދަރިންގެ ދަރިއަކަށް ކުރިމަގަށް ފެންނަ ހަމައެކަނި އޮތް އަލިކޮޅަކީ މިވަގުތު ރައީސް ޞާލިހު. އިބްރާޙިމް މުހައްމަދު ޞާލިހަށް ދެވަނަ ދައުރެއް މުހިންމުވާ ސަބަބަކީ ރަށްރަށްރަށުގައި ފަށާފައިވާ މަޝްރޫއުތައް ހުއްޓޭނެ އިނގޭތޯ. މިކަން ނުވެއްޖެއްޔާ. ލޯންޗުތަކާއި އެއްޗެހި ހުންނާނީ އެހިލާފައި. އާރްޓީއެލް ފެރީތައް ހުންނާނީ އެހިލާފައި. ފަސްގަނޑުތަކުން ވެލިތައް ފައިބައިގެންދާނެ. އެއީ ގުދުރަތީ ގޮތުން ބޮޑު ކަމެއް ވާނެ ވާހަކަ އެއްނޫން. އުމްރާނީ ތަރައްގީގެ އެތައް ކަމެއް ހުއްޓޭނެ. ރާއްޖޭގެ ރައްޔިތުން ބިކަވަމުންދާނީ. އެއީ މިއަދު ފެށިފައި ހުރީ ދުރުމުސްތަގުބަލަށް ވިސްނައިގެން ކުރިއަށް ގެންދާ ޕްރޮޖެކްޓްތަކެއް. އެކަންކަން ދުރާލާ ރާވައިގެން ކުރަން ކުޑަ ވަގުތުކޮޅެއް ބޭނުންވޭ. އަދި އެއްދައުރުބޭނުންވޭ. އެދައުރު ލިބިއްޖެއްޔާ ދިވެހިރާއްޖެ ނުދެކޭ ފަދަ ވަރުގަދަ ދިވެހިރާއްޖެއް އުފެދިގެންދާނެ.މެނޭޖިންގ ޑިރެކްޓަރު ތޮއްޔިބު މުހައްމަދު
އެމްޑީޕީގެ ކުރީގެ ރައީސް މުހައްމަދު ނަޝީދު، އެމްޑީޕީ ރޫޅާލާނެ ކަމަށް ވިދާޅުވުމާއި ގުޅިގެން އެކަމަށް ރައްދު ދެއްވައި ތޮއްޔިބު ވިދާޅުވީ އެމްޑީޕީއަކީ ވަކި މީހެއްގެ އެއްޗެއްނޫން ކަމަށާއި، އެއީ ރައްޔިތުންތަކެއްގެ ފިކުރެއް ކަމަށެވެ. އެމްޑީޕީއަކީ ރާއްޖޭގެ ރައްޔިތުންނަށް ރަނގަޅު ވިސްނުންތައް ވިސްނައިދޭ ޕާޓީ ކަމަށާއި، ގައުމާއި، ރައްޔިތުންނަށްޓަކައި މަސައްކަތް ކުރާ ޕާޓީއެއް ކަމަށް އޭނާ ވިދާޅުވިއެވެ. އަބަދުވެސް އެމްޑީޕީން މަސައްކަތް ކުރަނީ ކުރިމަގަށް ބަލައި، ކުރިމަގުގައި ގައުމު ރަނގަޅު ގޮތުގައި ބައްޓަން ކުރުމަށް ކަމަށް ތޮއްޔިބު ވިދާޅުވިއެވެ. އަދި ވިދާޅުވީ ޕާޓީގައި އުޅޭ މީހަކު ހިތްހަމަ ނުޖެހުނު ނަމަވެސް ޕާޓީ ރޫޅާނުލެވޭނެ ކަމަށާއި، އެމްޑީޕީއަކީ ހަރުދަނާ ޕާޓީއެއް ކަމަށެވެ.
