އަންގާރަ ދުވަހު ހުޅުމާލޭގައި ކުރިޔަށްދިޔަ ގައުމީ ޓްރަޔަލްގައި 800 މީޓަރު ދުވުމުގެ ގައުމީ ރެކޯޑް، ފަސޫހާ އަހުމަދު އައުކޮށްފިއެވެ.
މިއީ ފަސޫހާ މި ރެކޯޑް އައުކުރި ދެވަނަ ފަހަރެވެ. 13 އަހަރު ދުވަހު އެއްވެސް މީހަކަށް މުގުރާނުލެވި އޮތް މި ރެކޯޑް ފަސޫހާ ފުރަތަމަ މުގުރާލީ މި އަހަރުގެ މެއި މަހުގެ ތެރޭގައެވެ. އެފަހަރު ފަސޫހާ ރޭސް ނިންމާފައިވަނީ 2 މިނެޓް 27.92 ސިކުންތުންނެވެ. މީގެ ކުރިން 800 މީޓަރުގެ ރެކޯޑު އޮތީ 2009 ވަނަ އަހަރު ޖަރުމަނުގެ ބަރލިންގައި ކުރިއަށްދިޔަ ވޯލްޑް ޗެމްޕިއަންޝިޕްގައި ވާދަކުރި އާއިޝަތު ރީޝާ އަތުގައެވެ. އޭނާ ރޭސް ނިންމާފައިވަނީ 2 މިނެޓު 28 ސިކުންތުންނެވެ.
ފަސޫހާގެ އަމިއްލަ ރެކޯޑް މިފަހަރު އައުކޮށްފައިވަނީ 2 މިނެޓް 21.83 ސިކުންތުން ނިންމައިގެނެވެ. އޭނާއަކީ އެތުލެޓިކްސްގައި ކުރިއަރަމުން އަންނަ ޒުވާން އެތުލީޓެކެވެ.
އެސޯސިއޭޝަނުންނާއި ހުރިހާ އެތުލީޓުންވެސް މިހާރު ތައްޔާރުވަމުންދަނީ އޮގަސްޓް މަހު މަޑަގަސްކަރާގައި ފަށާ އިންޑިއަން އޯޝަން އައިލެންޑް ގޭމްސްް (އައިއޯއައިޖީ)އާއި ސެޕްޓެމްބަރު މަހު ޗައިނާގެ ހަންޒޫގައި ކުރިއަށްދާ އޭޝިއަން ގޭމްސްއަށެވެ.
