ލިވަޕޫލް ދޫކޮށް ޖޭމްސް މިލްނާ ހިލޭ ޓްރާންސްފާއެއްގެ ދަށުން ބްރައިޓަންއާ ގުޅިއްޖެއެވެ.

އިނގިރޭސި ޕްރިމިއާ ލީގުގެ ދެ ކްލަބުން ބުދަ ދުވަހު ކުރި އިއުލާނެއްގައި ބުނެފައި ވަނީ ލިވަޕޫލްގައި ކާމިޔާބު އަށް އަހަރު ހޭދަކުރުމަށް ފަހު ޖޭމްސް މިލްނާ އަންނަ މަހު ބްރައިޓަންއާ ގުޅޭނެ ކަމަށެވެ.

މިލްނާ އެއް އަހަރު ދުވަހުގެ އެއްބަސްވުމެއްގައި ސޮއިކުރީ ލިވަޕޫލާ އެކު 332 މެޗު ކުޅުމަށްފަހުއެވެ. އޭނާ ވަނީ ޗެމްޕިއަންސް ލީގާއި ޕްރިމިއާ ލީގާއި އެފްއޭ ކަޕް އަދި ލީގު ކަޕް ކާމިޔާބުކޮށްދިނުމުގައި ލިވަޕޫލް އަށް އެހީތެރިވެދީފައެވެ.

ޔޫރޮޕާ ލީގަށް ކޮލިފައިވެފައިވާ ބްރައިޓަން ފުރަތަމަ ފަހަރަށް ޔޫރަޕްގައި ކުޅޭއިރު، އެ ކްލަބުގެ ޓެކްނިކަލް ޑައިރެކްޓަރު ޑޭވިޑް ވެއިރް ބުނީ މިލްނާގެ ތަޖުރިބާ ބޭނުންވާނެ ކަމަށެވެ.

ޕްރިމިއާ ލީގުގައި މިހާތަނަށް 619 މެޗު ކުޅެފައިވާ މިލްނާ އޮތީ ގެރެތު ބެރީ (652) އާއި ރަޔަން ގިގްސް (632) ގެ ފަހަތުން ތިން ވަނައިގަ އެވެ.