ޖަރުމަނުގެ ޗެމްޕިއަން ބަޔާން މިއުނިކުން މިޑްފީލްޑަރު ކޮންރަޑް ލައިމާ އާއެކު އެއްބަސްވުމުގައި ސޮއިކޮށްފިއެވެ.
ލައިމާ ބަޔާންއަށް ބަދަލުވީ ވާދަވެރި ލެއިޕްޒިގުން ހިލޭ ޓްރާންސްފާ އެއްގެ ދަށުންނެވެ. މި ސީޒަނުގައި ލެއިޕްޒިގް އާއެކު ޖަރުމަނު ކަޕު ކާމިޔާބުކުރުމަށްފަހު ލައިމާ ވަނީ ޓީމު ދޫކޮށްލާނެ ވާހަކަ އިއުލާނުކޮށްފައެވެ. އޭނާ ބަޔާން އާއެކު ސޮއިކުރީ ހަތަރު އަހަރު ދުވަހުގެ އެއްބަސްވުމެއްގައެވެ.
އުމުރުން 26 އަހަރުގެ ލައިމާ ވަނީ 2017 ވަނަ އަހަރު ރެޑްބުލް ސަލްޒްބާގުން ބަދަލުވި ފަހުން ލައިޕްޒިގަށް 190 މެޗު ކުޅެދީފައެވެ. އޭނާ ބުނީ ބަޔާންއަށް ކުޅުމަކީ އަބަދުވެސް ދެކެމުން އައި ހުވަފެނެއް ކަމަށާ، އެ ޓީމަކީ އަބަދުވެސް އެންމެ ގިނައިން ލަނޑު ޖަހާ ޓީމު ކަމަށެވެ.
މެއި މަހުގައި ބަޔާން އިން ލީގު ކާމިޔާބުކުރީ ސީޒަނުގެ އެންމެ ފަހު މެޗުގައެވެ. ލެއިޕްޒިގް ސީޒަން ނިންމާލީ ބަޔާން އަށްވުރެ ފަސް ޕޮއިންޓު ފަހަތުން ތިން ވަނައިގައެވެ.
