ސިޔާސީ ކަންކަމަށް ކުރީގެ ނައިބުރައީސް އަޙުމަދު އަދީބު ބެއްސެވީ ރައީސުލްޖުމްހޫރިއްޔާ ޢަބްދުﷲ ޔާމީންގެ ފައިސާކަމަށް އެމަނިކުފާނު އެއްބަސްވެވަޑައިގެންފިއެވެ.
ރައްޔިތުންގެ މަޖިލީހުގެ ނައިބު ރައީސް އަދި މަޖިލީހުގެ ހުޅުހެންވޭރު ދާއިރާގެ މެންބަރު ރީކޯ މޫސާ މަނިކު، ވެރިކަންކުރާ ޕްރޮގްރެސިވް ޕާޓީ އޮފް މޯލްޑިވްސްއަށް ސޮއިކުރެއްވުމަށް ބޭއްވި ރަސްމިއްޔާތެއްގައި ބައިވެރިވެވަޑައިގެން ރާއްޖެޓީވީން ކުރި ސުވާލަކަށް ޖަވާބު ދެއްވަމުން ރައީސް ޔާމީން ވިދާޅުވީ، އެމަނިކުފާނަށް ތާޢީދުކުރާ، ހެޔޮއެދޭ އެކި ފަރާތްތަކުން ސިޔާސީ މަސައްކަތްތަކަށް އެމަނިކުފާނަށް ހަދިޔާކުރި ފައިސާ، ހަވާލުކުރެއްވީ އަދީބާއި ކަމަށެވެ.
"ޝައްކެއްވެސް ނެތް ގޮތުގަ، އަޅުގަނޑުގެ އިންތިޚާބަށް، އަޅުގަނޑުގެ ސިޔާސީ މަސައްކަތަށް ހެޔޮއެދޭ ފަރާތްތަކުން، ދީފަ ހުރި ފައިސާ، އަޅުގަނޑު އޭރު ބަލަހައްޓަމުން ގެންދިޔައީ އަދީބުގެ ތެރެއިން" ރައީސް ވިދާޅުވިއެވެ.
ރައީސް ވިދާޅުވީ، އެ ފައިސާ ހޯއްދެވުމުގައިވެސް އިސްކޮށް ހަރަކާތްތެރި ވެވަޑައިގަތީ އަދީބް ކަމަށެވެ. އަދި އަދީބު ކުރެއްވި މަސައްކަތްޕުޅުގެ ތެރެއިން، ހެޔޮއެދޭ ފަރާތްތަކުން ދިން ފައިސާ އަދީބު މެދުވެރިކޮށް "ބަލަހައްޓަވަމުން" ގެންދެވި ކަމަށް ރައީސް ވިދާޅުވި ނަމަވެސް، އެމަނިކުފާނު ވަނީ އެ ފައިސާގެ ތަފްޞީލު އެމަނިކުފާނަށް އެނގިނުލައްވާ ކަމަށް ވިދާޅުވެފައެވެ.
އެންމެ ފަހުން ރައީސް ޔާމީން ހައްޖަށް ވަޑައިގެންނެވި ފަހަރު، އެނބުރި ރާއްޖެ ވަޑައިގަތުމުން، އެ ފައިސާގެ ތަފްބީލް ދެއްވާނެ ކަމަށް އަދީބު ވިދާޅުވެފައިވާ ކަމަށްވެސް ރައީސް ވަނީ ވިދާޅުވެފައެވެ.
ރައީސް ޔާމީން ވިދާޅުވީ، އަދީބަށް އެމަނިކުފާނު ފައިސާ ދެއްވައި، އަދީބު މެދުވެރި ކުރައްވައި ފައިސާ ޚަރަދުކުރައްވަމުން ގެންދެވިއިރު، އަދީބަށް އެހެނިހެން ގޮތްގޮތުން ފައިސާ ލިބިވަޑައިގެންނެވިކަން އެނގިވަޑައި ނުގަންނަވާ ކަމަށާ، އެހެންކަމުން އަދީބު އަތުގައި ހުރި ފައިސާގެ ތެރެއިން އެމަނިކުފާނުގެ ފައިސާގެ މިންވަރަކީ ކިހާވަރެއްކަން އެނގިނުލައްވާ ކަމަށެވެ.
އަދީބަކީ ޕީއޭގެ ޒަމާނުއްސުރެ ރައީސް ޔާމީން އާއި އެކު މަސައްކަތް ކުރެއްވި، ވަރަށް ކުޅަދާނަ ބޭފުޅެއްކަން ރައީސް ޔާމީން ފާހަގަކުރެއްވިއެވެ. އެގޮތުން، އަދީބަކީ ޕީއާރް ރަނގަޅު ބޭފުޅެއް ކަމާއި، އެމަނިކުފާނު ޓުއަރިޒަމް މިނިސްޓަރުކަމަށް އައްޔަން ކުރުމާއި އެކު ރައީސް ވަހީދުގެ ސަރުކާރަށްވެސް، އަދި ރައީސް ޔާމީންގެ ސަރުކާރަށްވެސް ގިނަ ފައިދާތަކެއް ވެގެންދިޔަކަން އެމަނިކުފާނު ފާހަގަކުރެއްވިއެވެ.
އަދީބު ބެއްސެވި ފާއިސާގެ މަސްދަރުގެ ވާހަކަ ފެންމަތިވެފައިވަނީ، އަދީބް ހައްޔަރުކުރުމަށްފަހު، މުލިއާގޭގައި ރައްޔިތުންގެ މަޖިލީހުގެ ބައެއް މެންބަރުންނާއި ބައްދަލުކުރައްވާ، އަދީބު ބައްސަވަނީ ރައީސް ޔާމީންގެ ފައިސާ ކަމަށް އެމަނިކުފާނު ވިދާޅުވިކަމަށް މަޖިލީހުގެ ބައެއް މެންބަރުން ވިދާޅުވުމާއި ގުޅިގެންނެވެ.
