ޖުޑިޝަލް ސާވިސް ކޮމިޝަން (ޖޭއެސްސީ) އަށް ރައީސް އިންތިހާބު ކުރުމަށް ބާއްވާ ބައްދަލުވުން މިރޭ އޮންނާނެ ކަމަށް ޖުޑިޝަލް ސާވިސް ކޮމިޝަނުން ބުނެފިއެވެ.
ރާއްޖެއެމްވީ އަށް މައުލޫމާތު ދެއްވަމުން ޖޭއެސްސީގެ މީޑިއާ އޮފިޝަލް ވިދާޅުވީ ޖޭއެސްސީ އަށް ރައީސްއަކު އިންތިހާބުކުރުމުގެ ބައްދަލުވުން މިރޭ ބޭއްވުމަށް ނިންމާފައިވާ ކަމަށެވެ. ނަަމވެސް ވަކި ވަގުތެއް ހާމަކޮށްފައެއް ނުވެއެވެ.
ޖުޑިޝަލް ސާވިސް ކޮމިޝަންގެ ރައީސަކު އިންތިޚާބު ކުރަން ޖެހިފައި ވަނީ އެ މަގާމުގައި ހުންނެވި އަލީ ހަމީދުގެ ބަދަލުގައި އެމަގާމަށް އަބްދުﷲ އަރީފު އައްޔަންކޮށްފައިވާތީއެވެ. އަރީފު ކޮމިޝަންގެ މެންބަރު ކަމަށް އައްޔަންކޮށްފައި ވަނީ މިއަދުއެވެ.
އަރީފު ވަނީ މިއަދު ހެނދުނު ބޭއްވި ރަސްމިއްޔާތެއްގައި ޖޭއެސްސީގެ މެންބަރު ކަމުގެ ހުވާ ކުރައްވާފައެވެ.
އަލީ ހަމީދު ޖެއެސްސީގެ ރައީސް ކަމަށް އިންތިހާބުކޮށްފައި ވަނީ 2015 ވަނަ އަހަރުގެ ޖެނުއަރީ މަހުގެ 21 ވަނަ ދުވަހުއެވެ.
