ރެއާލްގެ ކޯޗު ކަމުގައި ދެމިހުންނާނެކަމަށް އެ ޓީމުގެ ކޯޗު، ކާލޮ އެންޗެލޮޓީ ބުނެފިއެވެ.

އެންޗެލޮޓީ ބްރެޒިލްގެ ގައުމީ ޓީމާ ހަވާލުވާނެކަމަށް ގިނަ ވާހަކަތަކެއް ފެތުރޭއިރު، އޭނާ ބުނީ ރެއާލް އާއެކު ހަދާފައިވާ އެއްބަސްވުމަށް ބަލާކަމަށެވެ. އޭނާ ބުނީ، 2024 ވަނަ އަހަރުގެ ސީޒަން ނިމުމާ ހަމައަށް އެއްބަސްވުން އޮތްކަމަށާއި، ޓީމުގައި މަޑުކުރަން ބޭނުންކަމަށެވެ. އެންޗެލޮޓީ ބުނި ގޮތުގައި ރެއާލް އިން ވަނީ އޭނާ މަގާމުގައި ބަހައްޓާނެ ކަމުގެ ޔަގީންކަން ދީފައެވެ.

އެންޗެލޮޓީ ވަނީ 2013 އިން 2015 އަށް ރެއާލްގެ ކޯޗުކަން ކޮށްދީ، އެ މުއްދަތުގެ ތެރޭގައި އެ ޓީމަށް ޗެމްޕިއަންސް ލީގު ކާމިޔާބުކޮށްދީފައެވެ. އެޔަށްފަހު ދެވަނަ ފަހަރަށް ރެއާލް އާ ހަވާލުވީ އެވަޓަން ދޫކޮށްލުމަށްފަހު 2021 ވަނަ އަހަރު ޖޫން ގައެވެ.

މިދިޔަ ސީޒަނުގައި ރެއާލް އިން ވަނީ އެންޗެލޮޓީ އާއެކު ސްޕެނިޝް ލީގުގެ އިތުރުން، ތާރީހީ 14 ވަނަ ޗެމްޕިއަންސް ލީގު ކާމިޔާބުކޮށްފައެވެ. ނަމަވެސް މި ސީޒަނުގައި، ޗެމްޕިއަންސް ލީގު ސެމީ ގައި ސިޓީ އަތުން ހިތްދަތި ގޮތަކަށް ބަލިވިއިރު، ލީގު ތާވަލުގައި އޮތީ ބާސާ އަށްވުރެ 14 ޕޮއިންޓު ދަށުގައެވެ.

މި ސީޒަން އާ ގުޅޭގޮތުން ސުވާލުކުރުމުން އެންޗެލޮޓީ ބުނީ، މިއީ ގޯސް ސީޒަން އެއްކަމަށް ނުބުނާނެ ކަމަށާ، އިތުރަށް ރަނގަޅު ކުރެވުނީސް ކަމަށެވެ. އޭނާ އިތުރަށް ބުނީ ލީގުގެ ނަތިޖާއާ މެދު ހިތްހަމަނުޖެހުނަސް، މި ސީޒަނުގައި އިތުރު ތިން ތަށި ކާމިޔާބުކުރެވިފައިވާ ކަމަށެވެ.

އެންޗެލޮޓީގެ ކޯޗު ކަމުގެ ދަށުން ރެއާލް އިން ވަނީ މި ސީޒަނުގައި ޔުއެފާ ސުޕަ ކަޕް، ފީފާ ކްލަބް ވޯލްޑް ކަޕުގެ އިތުރުން ކޮޕަ ޑެލްރޭ މުބާރާތް ކާމިޔާބުކޮށްފައެވެ.