ވެރިކަންކުރާ ޕްރޮގްރެސިވް ޕާޓީ އޮފް މޯލްޑިވްސްގެ ޕާލިމެޓްރީ ގްރޫޕުގެ ވަފުދެއް ނިމިގެންދިޔަ ހަފްތާގައި އަވަށްޓެރި ސްރީލަންކާއަށް ކުރި ދަތުރުގެ މަޤުޞަދާއި ގުޅިގެން ޕީޖީ ލީޑަރު އަޙުމަދު ނިހާން ޙުސައިން މަނިކާއި، ޑެޕިއުޓީ ޕީޖީ ލީޑަރު އިބްރާހިމް ފަލާޙް ދެގޮތަކަށް ވާހަކަފުޅު ދައްކަވައިފިއެވެ.
ދަތުރު ނިންމަވާލެއްވުމަށްފަހު، މާލެ ވަޑައިގެން، ރާއްޖެޓީވީއަށް ދެއްވި އެކްސްކްލޫސިވް އިންޓަރވިއުއެއްގައި ޕީޕީއެމްގެ ޑެޕިއުޓީ ޕީޖީ ލީޑަރު ފަލާޙް ވިދާޅުވީ، މި ދަތުރަކީ 2018 ގެ ރިޔަސީ އިންތިޚާބުގެ ކެމްޕެއިން ސްރީ ލަންކާގައި ކުރިއަށްގެންދާނެ ގޮތް ރޭވުމަށް ކުރެއްވި ދަތުރެއް ކަމަށެވެ.
"ރައީސުލްޖުމްހޫރިއްޔާ، 2018 ވަނަ އަހަރު އެމަނިކުފާނު ރައީސުލްޖުމްހޫރިއްޔާ ކަމުގެ މަޤާމަށް ކުރިމަތިލައްވާނެ މިހާރު ވަނީ އަޅުގަނޑުމެންނަށް ޔަޤީންވެފަ. އެހެންވީމަ އިރާދަކުރެއްވިއްޔާ އެމަނިކުފާނަށް ތާޢީދު ހޯދުމަށްޓަކާ އަޅުގަނޑުމެން، ކޮލަމްބޯ އަކީ ތިޔަބޭފުޅުންނަށްވެސް އެނގިވަޑައިގަންނަވާނެ ގާތްގަނޑަކަށް ފަންސަވީހަކަށް ހާސް ދިވެހިން ދިރިއުޅޭ (ތަނެއް). އެހެންވީމަ އެތަނުގަ އަޅުގަނޑުމެންގެ ސަޕޯޓަރުންނާ، އިސް ފަރާތްތަކާ ބައްދަލުކޮށް އެބޭފުޅުންނަށް މި ކެމްޕޭނުގެ ހަރަކާތްތައް ކުރިއަށް ގެންދާނެ ގޮތާ، އެކަންކަން ކުރާނެ، ރާވާނެ ގޮތާ މި ކަންކަން ހާމަކޮށްދީ އެމީހުންނާ ބައްދަލުކޮށްލަން ކުރި ދަތުރެއް މީ" ފަލާޙް ވިދާޅުވިއެވެ.
މި ދަތުރަކީ 2018 ގެ ރިޔާސީ އިންތިޚާބާއި ގުޅޭ ދަތުރެއް ކަމަށް ފަލާޙް ވިދާޅުވި ނަމަވެސް، މާލެ ވަޑައިގެން، ޕީޕީއެމްގެ ޕީޖީ ލީޑަރު ނިހާން ކުރެއްވި ޓްވީޓެއްގައި މި ދަތުރު ސިފަކުރައްވާފައިވަނީ މި އަހަރާއި ގުޅޭ ދަތުރެއްގެ ގޮތުގައެވެ. އެގޮތުން ނިހާން ވަނީ މި ދަތުރު "މިޝަން 2017" އިގެ ގޮތުގައި ސިފަކުރައްވާފައެވެ.
#Mission2017 Returned from Colombo! pic.twitter.com/zIIdRClTYN
— Ahmed Nihan (@ahmed_nihan) July 8, 2017
މި ދަތުރުގެ މަޤުޞަދާއިމެދު ޕީޖީ ވަފުދުގެ އެންމެ އިސް ދެ ބޭފުޅުންގެ ވާހަކަފުޅުގައި ޚިލާފު ހުރިއިރު، ރާއްޖެއެމްވީއަށް މައުލޫމާތު ލިބިފައިވާ ގޮތުގައި، މި ވަފުދު ލަންކާއަށް ވަޑައިގެންފައި ވަނީ މަޖިލީހުގެ ރައީސްގެ އިތުބާރު ނެތް ކަމުގެ މައްސަލާގައި ސޮއި ކުރެއްވި ޕީޕީއެމްގެ މެމްބަރުންނާ ބައްދަލުކުރެއްވުމަށެވެ. ނަމަވެސް ޑެޕިއުޓީ ޕީޖީ ލީޑަރު ފަލާޙް ވަނީ އެކަން ދޮގުކުރައްވާފައެވެ.
މި ދަތުރުގައި ނިހާން އާއި ފަލާޙްގެ އިތުރުން ބައިވެރިވެވަޑައިގެންނެވީ ޕީޕީއެމްގެ މުސްތަޝާރު ފެކްޝަންގެ ނައިބު ރައީސް، އަދި ފޮނަދޫ ދާއިރާގެ މެންބަރު ޢަބްދުއްރަޙީމް ޢަބްދުﷲ އާއި ފޭދޫ ދާއިރާގެ މެމްބަރު އިބްރާހިމް ދީދީ އާއި ހޯރަފުށި ދާއިރާގެ މެމްބަރު މުހައްމަދު އިސްމާއިލް އަދި ނައިފަރު ދާއިރާގެ މެންބަރު އަޙުމަދު ޝިޔާމްއެވެ.
