އަންނަ ސީޒަނުގައި ވެސްޓްހޭމްގެ ކެޕްޓަން ޑިކްލަން ރައިސް ކުޅޭނީ ޗެމްޕިއަންސް ލީގު ކުޅޭ ޓީމަކަށް ކަމަށް އޭނާ ބުނެފިއެވެ.
އިނގިރޭސި ގައުމީ ޓީމުގެ މެދުތެރޭގައި ވެސް މުހިންމު ދައުރެއް އަދާކުރަމުން އަންނަ ކުޅުންތެރިޔާ ބުނީ, މިއީ ކެރިއަރުގައި ބޮޑު ކުލަބަކަށް ބަދަލުވާންވީ ވަގުތު ކަމަށެވެ.
100 ޕަސެންޓް ޔަގީން، އަހަރެން ކުޅޭނީ ޗެމްޕިއަންސް ލީގު ކުޅޭ ކުލަބަކަށް. އަހަރެންގެ ކުލަބުގަ އަހަރެން މިދަނީ ގަވައިދުން ރަނގަޅަށް ކުޅެމުން. މިހާރު އަހަރެން ބޭނުންވަނީ ޗެމްޕިއަންސް ލީގުގަ ކުޅެ ތަށިތަކެއް ހޯދަން. އަހަރެންގެ ރަހުމަތްތެރިން މި މުބާރާތުގަ ކުޅެ ތަށިތައް ހޯދާތަން އަހަރެންނަށް އެބަފެނޭ.ރައިސް
އޭނާ ބުނީ ކެރިއަރު ނިމޭއިރު އެންމެންނަށްވެސް ފެންނާނީ ހޯދާފައިވާ ކާމިޔާބީތައް އެކަނި ކަމަށާއި، އެހެންވެ ތަށި ހަރުގަނޑު ހުހަށް ހުންނަން ބޭނުންނުވާކަމަށެވެ.
އޭނާ ގަތުމަށް އިނގިރޭސި ކުލަބުތަކުގެ ތެރެއިން އެންމެ ބޮޑަށް މަސައްކަތްކުރަނީ އާސެނަލްއެވެ. ނަމަވެސް މި ރޭހަށް ޗެލްސީ ވަންނާނެކަމަށް ކުޅުންތެރިޔާ ވެސް ގަބޫލުކުރެއެވެ. އަދި ލިވަޕޫލާއި މެންޗެސްޓަރ ޔުނައިޓެޑުން ވެސް މި ރޭހުގައި ވާދަކުރުން އެކަށީގެންވާ ކަމަށް އިނގިރޭސި މީޑިޔާތަކުން ބުނެއެވެ.
ނަމަވެސް މީގެ ތެރެއިން ޗެލްސީއަށް އަންނަ ސީޒަނުގެ ޗެމްޕިއަންސް ލީގުގައި ކުޅުމުގެ ފުރުސަތު ވަރަށް ކުޑައެވެ. އެ ޓީމު އޮތީ ޕްރެމިއަރ ލީގުގެ 12 ވަނާގައެވެ. ގަދަ ހަތަރަކަށް ޗެމްޕިއަންސް ލީގު ކުޅުމުގެ ފުރުސަތު ލިބޭއިރު ލިވަޕޫލް އޮތީ ފަސްވަނާގައެވެ. ބާކީ ފަސް މެޗު އޮތުމުން އެ ޓީމުން އުއްމީދުކުރަނީ ގަދަ ހަތަރެއްގެ ތެރެއަށް ވަނުމަށެވެ. ރައިސް މިހާރު ކުޅެމުން އަންނަ ވެސްޓްހޭމް އޮތީ 15 ވަނާގައެވެ.
