ހަފްތާ ބަންދުގައި މުޅި ރާއްޖެއަށް ގުގުރުމާއެކު ވިއްސާރަކުރާނެކަމަށް މޫސުމާއި ބެހޭ ގައުމީ އިދާރާއިން ބުނެފިއެވެ.

މެޓް އޮފީހުން ލަފާކޮށްފައިވާ ގޮތުގައި ހުކުރު އަދި ހޮނިހިރު ދުވަހުވެސް މުޅި ރާއްޖެއަށް ވިއްސާރަކުރާނެއެވެ. މުޅި ރާއްޖެއަށް ވިއްސާރަކުރާނެކަމަށް މެޓް އޮފީހުން ލަފާކޮށްފައިވާއިރު މިދުވަސްވަރަކީ ރާއްޖެއަށް ވަރަށް ހޫނު ގަދަ ދުވަސްވަރެކެވެ. ބުރާސްފަތި ދުވަހު އިހުސާސްކުރެވޭ ހޫނުމިން ވަނީ ބައެއް ހިސާބުތަކުގައި 45 ޑިގްރީ ސެލްސިއަސް އަށް އަރާފައެވެ. ބުދަ ދުވަހު އިހުސާސްކުރެވޭ ހޫނުމިން ބައެއް ހިސާބުތަކުގައި 43 ޑިގްރީ ސެލްސިއަސް އަށް ވަނީ އަރާފައެވެ. ހޫނުމިން މަތިވެފައިވީނަމަވެސް ކުރިޔަށް އޮތީ ވިއްސާރަ ދުވަސްވަރެއްކަމަށް މެޓް އޮފީހުން ވަނީ ލަފާކޮށްފައެވެ.

މެޓް އޮފީހުން ބުނީ ވައިޖެހޭނެކަމަށް ލަފާކުރަނީ ހުޅަނގުއުތުރާއި އުތުރުން ގަޑިއަކު 5 މޭލާއި 15 މޭލާއި ދެމެދުގެ ބާރުމިނުގައި ކަމަށެވެ. އަދި ވިލާގަނޑުގައި ގަޑިއަކު 35 މޭލަށް ވައިގަދަވާނެކަމަށް ވަނީ ލަފާކޮށްފައެވެ. ކަނޑުތައް އާދައިގެ ވަރަކަށް މަޑުވެފައި ވިލާގަނޑުގައި އާދައިގެ ވަރަކަށް ގަދަވާނެކަމަށް މެޓް އޮފީހުން ބުނެއެވެ.