ހަމަލާ ބަދަލުކުރުންތަކާއި ކުރިމަތިލުންތައް އޭގެ އެންމެ އިންތިހާއަށް ހޫނުވެފައިވާ ސޫދާންގެ މަސްރަޙު އޮތީ ނޭވާ ހިފަހައްޓާލަންޖެހޭ ފައްތަރެއްގައެވެ. ސޫދާންގެ މަސްރަޙަށް ބައިނަލްއަޤުވާމީ ސަމާލުކަން ހުއްޓިފައި ވާ އިރު، ސޫދާންގެ ރައްޔިތުން ވަނީ އެމީހުން އުފުލަމުންދާ ތަކުލީފުތަކާއި ކުރިމަތިލާންޖެހިފައިވާ ނުތަނަވަސްކަމުގެ ވާހަކަތައް މީޑިއާއާ ހިއްސާކޮށްފައެވެ.

ޢަރަބި އެހެން ޤައުމުތަކަށް ކުރިމަތިވި ފަދަ ހިތްދަތި ގޮތެއް، ޚުދު އޭނާގެ އަމިއްލަ ވަޒަނަށް ކުރިމަތިވެދާނެ ކަމުގެ ބިރުވެރިކަމުގައި ދުވަސްތައް ގުނަމުންދާ އެކަކީ، އަރކިޓެކްޓެއްގެ ގޮތުގައި މަސައްކަތް ކުރާ ސޫދާންގެ ޒުވާނެއް ކަމަށްވާ ހަދީލު މުޙައްމަދުއެވެ. ޢުމުރުން 28 އަހަރުގެ ހަދީލް ކިޔައިދިން ގޮތުގައި މީގެ ހަތަރު، 5 ދުވަހެއްގެ ކުރިން ވަރުގަދަ ޙަމަލާތައް ބަދަލު ކުރަން ފެށި ފަހުން، ކޮންމެ ދުވަހެއްގެ ހަތަރު ދަން ހޭދަ ކުރަނީ ގޭގައި ބަންދުވެފަ އިނދެއެވެ.

ސޫދާންގެ މަސްރަޙު ގޯހުން ގޯހަށް ގޮސްފައި ވަނީ ސޫދާންގެ ވެރިކަން ކުރާ ކައުންސިލްގެ މައްސަލާގައި، އެ ޤައުމުގެ އަސްކަރީ ލީޑަރާއި އޭނާގެ ނައިބާ ދެމެދު އުފެދުނު ދެބަސްވުންތަކަކާ ގުޅިގެންނެވެ. ސޫދާންގައި އެތައް އަހަރެއް ވަންދެން ވެރިކަން ކުރި ޚުދުމުޚުތާރު ލީޑަރު، ޢުމަރު އަލް-ބަޝީރުގެ ވެރިކަން ވައްޓާލުމަށްފަހު، ރައްޔިތުންގެ ފަރާތުން، ޑިމޮކްރަޓިކް އުސޫލުން ހިންގާ މަދަނީ ވެރިކަމުގެ ނިޒާމަކަށް ޤައުމުގެ ވެރިކަން ބަދަލު ކުރުމަށް އޮތް ޕްލޭނަށް ބައިނަލްއަޤުވާމީ ތާޢިދު ލިބިފައި އޮތެއް ކަމަކު، 4 އަހަރުވީ އެ މަޝްރޫއުވެސް ކާމިޔާބު ވެދާނެކަމުގެ ޢުއްމީދުތައް މިހާރު ވަނީ ފަނޑުވެފައެވެ.

ސޫދާންގައި ހިންގަމުންދާ ހަމަނުޖެހުންތައް އިންތިހާއަށް ގަދަވަމުން ދާއިރު، އެ ޤައުމުގައި އިންސާނީ ކާރިޘާއެއް އުފެދިފައި ވާ ކަމަށް އދއިން ސިފަ ކުރެއެވެ. ޤައުމުގެ ޞިއްޚީ ނިޒާމު އޮތީ މުޅިންހެން ދެފުށްޖެހިފައެވެ. މުޅި ޤައުމުގެ އެކި ހިސާބުތަކަށް ފެތުރެމުންދާ ކުރިމަތިލުންތަކާއި ހަމަނުޖެހުންތަކުގައި މަރުވި މީހުންގެ ޢަދަދު، ހަފުތާގެ މެދަކާ ހިސާބަށް ދެވުނުއިރު 180 އަށް ވުރެ މައްޗަށް ވަނީ އަރާފައެވެ.

ހަދީލް ކިޔައިދިން ގޮތުގައި ގެއަށް ކޮންމެހެން ބޭނުންވާ ސާމާނު ގަތުމަށް، ކޮންމެވެސް ވަރަކަށް ބޭރަށް ގޮސް އުޅެނީ އޭނާގެ ބޭބެއެވެ. އެ ވަޤުތުތަކަކީވެސް ވަކި އަމާން ވަޤުތުތަކެއް ނޫން ކަމަށާ، އެއީވެސް ނުތަނަވަސްކަމެއް ކަމަށް ހަދީލް ކިޔައިދިނެވެ.

ހަމަލާތައް ވަރުގަދަކޮށްފައި ވާ މި ދަނޑިވަޅަކީ ބަރަކާތްތެރި ރަމަޟާން މަހުގެ ފަހު 10ގެ ދުވަސްތަކެވެ. ރަމަޟާން މަހަކީ ޢާންމު ގޮތެއްގައި އުފާވެރިކަމުގެ މައްސަރަކަށް ވީ ނަމަވެސް، ސޫދާންގެ މުސްލިމުންނަށް، މި ފަހަރުގެ ރަމަޟާން މަސް ވަރަށް ތަފާތެވެ.

ރެޕިޑް ސަޕޯރޓް ފޯރސަސް (އާރްއެސްއެފް)ގެ ލީޑަރު، މުޙައްމަދު ހަމްދާން ޑަގަލޯ ނުވަތަ އާންމު ނަމުން ދަންނަވާނަމަ، ހިމިދްތީއާއި، ސޫދާން އަސްކަރިއްޔާގެ އިސްވެރިޔާ، ޖެނެރަލް ޢަބްދުލްފައްތާޙް އަލް ބުރުހާންއާ ދެމެދު ހިންގަމުންދާ ކުރަމުންދާ ކުރިމަތިލުންތަކާ، ބަދަލު ކުރަމުންދާ ހަމަލާތަކާއެކު ގިނަ ހޮސްޕިޓަލުތަކެއްގައި ވަނީ ބޮޑުތަޅު އަޅުވާފައެވެ.

2 ލީޑަރުންނާއެކު، އެމެރިކާގެ ސެކްރެޓަރީ އޮފް ސްޓޭޓް، އެންތަނީ ބްލިންކަން ކުރިއަށް ގެންދެވި މަޝްވަރާތަކަށްފަހު، އަންގާރަ ދުވަހުގެ ރޭގަނޑުން ފަށައިގެން 24 ގަޑިއިރަށް ހަމަލާ ބަދަލު ކުރުންތައް ހުއްޓާލުމަށް އެއްބަސްވުމަކަށް އާދެވުނު ނަމަވެސް، ސުންގަޑިއާއެކު ބަޑީގެ އަޑުފަށްގަނޑުން ސޫދާން ވަނީ ގުގުމަން ފަށާފައެވެ. އެންމެ ބޮޑު ނުތަނަވަސް ކަމެއްގައި އޮތީ ވެރިކަން ކުރާ ޚާރްތޫމްއެވެ. އިންތިހާއަށް ފަޤީރުކަން ފެތުރިފައި ވާ ސޫދާންއަކީ، ދިރިއުޅުމުގެ ކަންކަން ހަމަޖެއްސުމަށްޓަކާ، ބައިނަލްއަޤުވާމީ އެހީއަށް ވަރަށް ބޮޑަށް ބަރޯސާވެފައި އޮތް ޤައުމެކެވެ.