ޗެލްސީގެ ކޯޗުކަމުން ގްރެހަމް ޕޮޓާ ވަކިކުރިތާ 24 ގަޑިއިރުވީއިރު އޭނާ އަށް ޝުކުރުއަދާކުރީ އެންމެ ހަތަރު ކުޅުންތެރިންކަން ހާމަވެއްޖެއެވެ.

އިނގިރޭސި ނޫސްތަކުން ބުނަނީ މިކަމުން އަންގައިދެނީ ޕޮޓާ ވަކިކުރުމަށް ޗެލްސީގެ ގިނަ ކުޅުންތެރިން ރުހުން އޮތްކަމެވެ. މަގާމާ ހަވާލުވިތާ އެންމެ ހައެއްކަ މަހަށް ފަހު ޕޮޓާ މަގާމުން ވަކިކުރީނަތީޖާތައް ގޯސްވެ، އަންނަ ސީޒަނުގެ ޗެމްޕިއަންސް ލީގުން ޖާގަ ނުލިބިދާނެހެން ހީވުމުންނެވެ.

ސޯޝަލް މީޑިއާ މެދުވެރިކޮށް ޕޮޓާ އަށް ޝުކުރު އަދާކުރީ ސީނިއާ ޓީމުގެ ދެ ކުޅުންތެރިން ކަމަށްވާ ޑިފެންޑަރު ބެންޗިލްވެލް އާއި މާކް ކުކުރެއްޔާ އެވެ. އަދ މި ދެ ކުޅުންތެރިންނަށް ފަހު ވެސްލީ ފޮފާނާ އާއި ކައިހަވަޓްޒް ވެސް ވަނީ 24 ގަޑިއިރަށް ވަގުތު ކުޑަތަންވިފަހުން ކޯޗަށް ޝުކުރު އަދާކޮށްފައެވެ.

ފުރަތަމަ 11ގައި ނުކުޅުވާތީވެ ހިތްހަމަނުޖެހިފައހުރި ގެބޯންގެ ފޯވަޑް އެމެރޭ ޕެޓްރިކް އައުބަމިޔަންގް ވަނީ ޕޮޓާ ވަކިކުރިކަން ޗެލްސީން އިއުލާނުކުރި ޕޯސްޓަށް ލައިކްކޮށްފަ އެވެ.

ޗެލްސީން މިހާރު މަސައްކަތް ކުރަނީ އާ ކޯޗަކު އައްޔަންކުރުމަށެވެ. އެކުލަބުން ޝޯޓް ލިސްޓް ކޮށްފައިވަނީ ބާސެލޯނާ އާއި ސްޕޭންގެ ކުރީގެ ކޯޗު ލުއިސް އެންރީކޭ އާއި ޓޮޓެންހަމާއި ޕީއެސްޖީގެ ކުރީގެ ކޯޗު މައުރީސިއޯ ޕޮޗެޓީނޯ އާއި ބަޔާން މިއުނިކްގެ ކޯޗުކަމުން މިދިޔަ ހަފުތާގައި ވަކިކުރި ޒުވާން ކޯޗު ހޫލިއަން ނާގެލްސްމަން އެވެ.