ކްރިސްޓަލް ޕެލަސް ރެލިގޭޓްނުވެ ސަލާމަތްކުރުމަށް ކުރީގެ ކޯޗު ރޯއި ހޮޖްސަން ކޯޗަކަށް ހަމަޖައްސައިފި އެވެ.
ޕްރެމިއާ ލީގުގައި 27 ޕޮއިންޓާއެކު 12 ވަނާގައި އޮތް ޕެލަސްގެ ކޯޗުކަން ހޮޖްސަން އަށް ދިނީ އެ މަގާމުގައި ހުރި އާސެނަލްގެ ކުރީގެ ކެޕްޓަން ޕެޓްރިކް ވިއޭރާ ވަކިކޮށްފަ އެވެ. އޭނާ މަގާމުން ވަކިކުރިއިރު ޓީމު އޮތީ ރެލިގޭޝަން ޒޯނަށްވުރެ އެންމެ ތިން ޕޮއިންޓް ކުރީގަ އެވެ.
އެކުލަބުގެ ޗެއާމަން ސްޓީވް ޕަރިޝް ބުނީ ކޯޗުކަން އަލުން ހޮޖްސަން އަށް ދޭން ނިންމީ ރެލިގޭޓް ނުވެ ސަލާމަތްވުމަށް މަސައްކަތް ކުރާ ރޭހުގެ ވާދަވެރިކަން ބޮޑުވެ، މިވަގުތު ޓީމުގެ ނަތީޖާތައް ދަށްވެ، ޓީމު ވަރަށް ނާޒުކު ފައްތަރެއްގައި އޮތުމުން ކަމަށެވެ.
"އަހަހަރެން ގަބޫލުކުރާ ގޮތުގައި މިއީ ކުލަބަށް ވަރަށް ޗެލެންޖިން ވަގުތެއް. މިވަގުތު އަހަރެން ހޮޖްސަން އަށް މަރުހަބާ މކިޔަނީ އޭނާގެ ތަޖުރިބާ ވަރަށް މުހިންމުވުމުން. ޓީމު ރެލިގޭޓްނުވެ ސަލާމަތްކޮށްދެވޭނެ ގާބިލްކަން އޭނާގެ ކިބާގައި ހުންނާނެ،"ޗެއާމަން ބުންޏެވެ.
އުމުރުން 75 އަހަރުގެ ހޮޖްސަން އަކީ އިނގިރޭސި ފުޓްބޯޅައިގެ ވަރަށް ތަޖުރިބާކާރު ކޯޗެކެވެ. 1976 ވަނަ އަހަރުން ފެށިގެން އޭނާ ވަނީ ވަރަށް ގިނަ ޓީމުތަކަށް ކޯޗުކޮށްދީފަ އެވެ. އޭގެ ތެރެއން ފާހަގަކޮށްލެވޭ ކުލަބުތަކުގެ ތެރޭގައި ލިވަޕޫލް އާއި އިޓަލީގެ އިންޓަމިލާން އަދި އިނގިރޭސި ގައުމީ ޓީމު ވެސް ހިމެނެ އެވެ.
