މޯލްޑިވްސް ހައްޖު ކޯޕަރޭޝަންގެ ފަރާތުން މިއަހަރު ހައްޖު ދަތުރުގައި ހިލޭ ސާބަހަށް މަސައްކަތްކޮށްދޭނެ މީހުން ހޯދުމަށް އަނެއްކާވެސް އިއުލާންކޮށްފިއެވެ.

އެކޯޕަރޭޝަނުން ކޮށްފައިވާ އިއުލާނެއްގައި ބުނެފައިވަނީ, ހައްޖު ދަތުރުގައި ހިލޭ ސާބަހަށް މަސައްކަތްކޮށްދޭނެ މީހުން ހޯދުމަށް މާޗް 7ގައި ކުރި އިއުލާނެއް އެކަށީގެންވާ އަދަދެއްގެ މީހުން ކުރިމަތިލާފައިނުވާތީ، އަލުން އެ ފުރުސަތު ހުޅުވާލާކަމަށެވެ. އެހީތެރިންގެ ގޮތުގައި ބޭނުންވަނީ ފިރިހެނުންނެވެ.

ފެންވަރު ނުވަތަ ޝަރުތުތަކުގެ ތެރޭގައި ހިމެނެނީ، އަސާސީ ތައުލީމު ހާސިލުކޮށްފައިވުމާއި، ގިނަ ވަގުތު މަސައްކަތުގައި އުޅެވޭ އަދި ސިއްހަތު ރަނގަޅު މީހަކު ކަމުގައިވުމެވެ. މި މަގާމްތަކަށް މީހުން ހޮވުމުގައި; އަރަބި ބަސް ނުވަތަ އުރުދޫ ބަހުން މުއާމަލާތްކުރަން އެނގޭ، ހައްޖާއި އުމްރާގެ މަސައްކަތުގެ ދާއިރާއިން ތަޖުރިބާ ލިބިފައިވާ މީހުންނަށް އިސްކަންދެވޭނެކަމަށް އެކޯޕަރޭޝަނުން ބުނެއެވެ.

މިކަމަށް ޝައުގުވެރިވާ މީހުން، މާޗް 22ވާ ބުދަ ދުވަހުގެ މެންދުރު 3 ޖެހުމުގެ ކުރިން މޯލްޑިވްސް ހައްޖު ކޯޕަރޭޝަނަށް ހުށަހެޅުމަށް އެކޯޕަރޭޝަނުން އެދެއެވެ.

ސައޫދީ ސަރުކާރުން ދިވެހިރާއްޖެއިން މީހުން ހައްޖަށް ގެންދިއުމަށްޓަކައި ދޭ ރަސްމީ ކޯޓާގެ ގޮތުގައި 1000 ކޯޓާ މިއަހަރު ވަނީ ރާއްޖެއަށް ލިބިފައެވެ. ފާއިތުވި 1443 ވަނަ އަހަރު ހައްޖު ކޯޕަރޭޝަންގެ ފަރާތުން 458 މީހުން ހައްޖަށް ގެންގޮސްފައިވެއެވެ.