ބުރާސްފަތި ދުވަހުގެރޭ ބާއްވަން އޮތް މޯލްޑިވްސް ސްޕޯރޓްސް އެވޯޑްސް ހަފްލާ, ޖެހިގެން އަންނަ ހުކުރު ދުވަހުގެ ރެއަށް ފަސްކޮށްފިއެވެ.
ބުދަ ދުވަހު ހަވީރު ޔޫތު މިނިސްޓްރީން ކުއްލި ގޮތަކަށް އެނިންމުން ނިންމީ، މޫސުން ގޯސްވާނެކަމަށް މެޓް އޮފީހުން މައުލޫމާތު ދޭތީކަމަށް ބުނެއެވެ. މިނިސްޓްރީން ބުނީ މޫސުން ގޯސްވާނެކަމަށް މޯލްޑިވްސް މީޓިއޮރޮލޮޖިކަލް ސަރވިސްއިން ލަފާކޮށްފައިވާތީ، މޯލްޑިވްސް ސްޕޯރޓްސް އެވޯޑްސް ގާލާ ނައިޓް ހުކުރު ދުވަހުގެ ރެއަށް ފަސްކުރީކަމަށެވެ.
މީގެއިތުރުން ކުރިން ހުކުރު ދުވަހާއި ހޮނިހިރު ދުވަހުގެ ހަވީރާއި, ރޭގަނޑު ބާއްވަން ތާވަލްކޮށްފައި އޮތް ކުޑަކުދިންގެ ހަވީރާއި މިޔުޒިކް ޝޯވް ވަނީ ހޮނިހިރު ދުވަހާއި, އާދިއްތަ ދުވަހުގެ ހަވީރާއި ރޭގަނޑަށް ބަދަލުކޮށްފައެވެ.
މިބަދަލު ގެނައިއިރު އެވޯޑް ގާލާ ނައިޓަށް ދައުވަތު ކާޑުތައް ވަނީ ފޮނުވާފައެވެ. އަދި ރަސްމިއްޔާތުގައި ބައިވެރިވާ ދުނިޔޭގެ ޗެމްޕިއަނުން ވަނީ ރާއްޖެ އައިސްފައެވެ. ބުރާސްފަތި ދުވަހުގެ ރެއަށް ދައުވަތު ލިބިފައިވާ ފަރާތްތަކުން ހުކުރު ދުވަހުގެރޭ އެވޯޑް ގާލާ ނައިޓަށް ދިއުމަށް މިނިސްޓްރީން އެދެއެވެ. ރަސްމިއްޔާ އޮންނާނީ އެކުވެނި ޓްރެކް ދަނޑުގައެވެ. ފަށާނީ 20:30ގައެވެ.
