ކްލަބާއި މެދު ހިތްހަމަނުޖެހިގެން ކްރިސްޓިއާނޯ ރޮނާލްޑޯ ދެއްކި ވާހަކަތަކަށް މެންޗެސްޓަރ ޔުނައިޓެޑުން މާބޮޑު ސަމާލުކަމެއް ނުދޭފަދަ ގޮތަކަށް ރައްދު ދީފިއެވެ.
ރޮނާލްޑޮ ވަނީ ފާގަސަން ޔުނައިޓެޑު ދޫކޮށްލި ފަހުން ޓީމަށް އެއްވެސް ކުރި އެރުމެއް ނުލިބޭ ކަމަށް ބުނެފައެވެ. ރޮނާލްޑޯ އާއި ޔުނައިޓެޑާ ދެމެދު ގިނަ މައްސަލަތަކެއް ޖެހިފައިވާއިރު، މިއީ ރޮނާލްޑޯ އާންމުކޮށް އެވާހަކަތައް ދެއްކި ފުރަތަމަ ފަހަރެވެ. މީގެ ކުރިން ރޮނާލްޑޯ އޭނާގެ ސޯޝަލް މީޑިއާގައި ބުނީ އޭނާއާ ގުޅޭ ގޮތުން ދައްކަނީ ތެދު ވާހަކަތަކެއް ނޫން ކަމަށާއި، އެކަމުގެ ހަގީގަތް ވަރަށް އަވަހަށް ހާމަކުރާނެ ކަމަށެވެ.
ރޮނާލްޑޯ ބުނީ އޭނާ ޓެން ހާގަށް އެއްވެސް ވަރަކަށް އިހުތިރާމް ނުކުރާ ކަމަށެވެ. ސަބަބެއްގެ ގޮތުގައި ރޮނާލްޑޯ ބުނީ ޓެން ހާގް އޭނާ އަށް އިހުތިރާމް ނުކުރާތީކަމަށެވެ. ރޮނާލްޑޯ ބުނީ އެއްވެސް މީހަކު އޭނާ އަށް އިހުތިރާމް ނުކުރާ ނަމަ، އޭނާ ވެސް އިހުތިރާމް ނުކުރާނެ ކަމަށެވެ.
މީގެ އިތުރުން ރޮނާލްޑޯ ވަނީ ޔުނައިޓެޑަށް ވަރަށް ބޮޑަށް ފާޑުކިޔާފައެވެ. ރޮނާލްޑޯ ބުނީ ޔުނައިޓެޑުން އޭނާ އަށް ކަންކަން އޮޅުވާލި ކަމަށާއި، ކުލަބުން އޭނާ ބޭރުކުރަން ބޭނުންވާ ކުޅުންތެރިން ވެސް ތިބި ކަމަށެވެ. ރޮނާލްޑޯ ބުނީ އޭނާ ބޭރުކޮށްލަން ބޭނުންވަނީ ޓެން ހާގް އެކަނި ނޫން ކަމަށެވެ. މީގެ އިތުރުން އެއީ މި ސީޒަންގައި ވެގެން އުޅޭ ކަމެއް ނޫންކަން ފާހަގަކޮށް ރޮނާލްޑޯ ބުނީ ނިމުނު ސީޒަންގައި ވެސް އެކަން ބޭނުންވެގެން ބަޔަކު އުޅުނު ކަމަށެވެ.
މިކަމާއި ގުޅިގެން ޔުނައިޓެޑުން ނެރުނު ބަޔާނެއްގައި ބުނީ ރޮނާލްޑޮ ދެއްކި ވާހަކަތަކަށް ޖަވާބުދެވޭނީ ކްލަބުން އެކަންތައް ރަނގަޅަށް ބެލުމަށްފަހު ކަމަށެވެ. އަދި މިހާރު ޓީމުގެ ސަމާލުކަން އޮތީ ސީޒަންގެ ބާކީބައި ރަނގަޅު ގޮތުގައި ނިންމާލުމަށް ކަމަށެވެ. އަދި ޓީމުގެ ސްޓާފުންނާއި މެނޭޖުމެންޓު އަދި ކުޅުންތެރިން އެއްބައިވަންތަކަންމަތީގައި ކުރިއަށް ދިއުން ކަމަށެވެ.
