އިންޑިޔާގެ ގެރިތަކަށް ގޮތްނޭނގޭ ބައްޔެއް ޖެހެމުންދާކަމަށް ޚަބަރު ލިބިއްޖެއެވެ. ވައިރަހަކުން ޖެހޭ "ލަމްޕީ ސްކިން ޑިޒީޒް" ޖެހުމުން ގެރީގެ މުޅި ހަންގަނޑުގެ ދަށުން ތަންތަން އުފުލިފައި ހުރެއެވެ. އިންޑިޔާގެ ސަރުކާރުގެ ކަމާބެހޭ ފަރާތްތަކާއި ހަވާލާ ދީ ބީބީސީ އިން ރިޕޯޓުކޮށްފައިވާ ގޮތުގައި މިބަލި މިހާތަނަށް 2.4 މިލިއަން ގެރިޔަށް ޖެހިފައިވެއެވެ. އަދި 110،000 ހާސް ގެރި ބަލީގެ ސަބަބުން މަރުވެފައިވާކަމަށް ވެސް ރިޕޯޓުކޮށްފައިވެއެވެ.

ނަމަވެސް މި ބައްޔާ ބެހޭގޮތުން ސޯޝަލް މީޑިޔާގައި ސައްޙަ ނޫން މައުލޫމާތު ފަތުރަމުންދާކަމަށް ވެސް މި ރިޕޯޓުގައި ބުނެފައިވެއެވެ.

އިންޑިޔާއަކީ ދުނިޔޭގައި އެންމެ ގިނައިން ގެރި ކިރު އުފައްދާ ގައުމެވެ. އަދި ގެރީގެ އެންމެ ބޮޑު އާބާދީ އޮންނަނީ ވެސް އިންޑިޔާގައެވެ. އެހެންކަމާ އެކު ކިރާއި އެއްގަމު މަހުގެ ވިޔަފާރި ކުރާ ފަރާތްތަކުގެ އާމްދަނީ އަށް ވަނީ މިބަލީގެ ސަބަބުން ވަރަށް ބޮޑަށް ނޭދެވޭ އަސަރު ކުރަން ފަށާފައެވެ.

ވައިރަލްވެފައިވާ ބައެއް ސޯޝަލް މީޑިއާ ޕޯސްޓުތައް ބުނާ ގޮތުން ބަލިޖެހިފައިވާ ގެރީގެ ކިރު ބުއިމުން އިންސާނުންނަށް ވެސް އެފަދަ ބައްޔެއް ޖެހެއެވެ. އެހެން ކަމުން ބުއިމަށް ރައްކާތެރިއެއް ނޫނެވެ. މިފަދަ ޕޯސްޓުތަކުގައި ބަލިޖެހިފައިވާކަމަށް ބުނާ ބައެއް މީހުންގެ ފޮޓޯ ވެސް ހިމަނާފައި ހުރެއެވެ.

ނަމަވެސް ބީބީސީގެ ރިޕޯޓުގައިވާ ގޮތުން ކިރުގެ ޒަރީއާއިން އިންސާނުންނަށް މިބަލި ނާރައެވެ. މި އައުލޫމާތު ދީފައިވަނީ ހަރިޔާނާ ސްޓޭޓުގައި ގާއިމުކޮށްފައިވާ، ގެރި ގެންގުޅޭ 6،000 އަށް ވުރެ ގިނަ ފަރާތްތަކުގެ އެސޯސިއޭޝަނެއްގެ ސެކްރެޓަރީ ޖެނެރަލް ޕޯރަސް މެހްލާއެވެ.

ސޯޝަލް މީޑިޔާގައި ފަށާފައިވާ އެންޓި ކެމްޕެއިންގެ ސަބަބުން ގިނަ ބަޔަކު އެވާހަކަ ޤަބޫލުކޮށް ގިނަ އަދަދެއްގެ ކިރު އުކާލަމުންދާކަމަށް ވެސް ރާޖަސްތާނުގައި ގެރި މަހާއި ކިރުގެ ވިޔަފާރީގައި ހަރަކާތްތެރިވާ އިސްފަރާތަކުން ބުނެފައިވެއެވެ. އަދި "ލަމްޕީ ސްކިން ޑިޒީޒް" ގެ ސަބަބުން ގިނަ އަދަދެއްގެ ގެރި މަރުވުމުގެ ސަބަބުން ގެއްލުންވި ފަރާތަކަށް ކިރު ވިއްކޭގޮތް ނުވުމުން ވެސް އިތުރު ދައްޗާ ވަނީ ކުރިމަތިލާން ޖެހިފައެވެ.

ގޫގަލް ޓްރެންޑްގެ ޑާޓާ ދައްކާގޮތުން މިބަލި ޖެހިފައިވާ ގެރީގެ ކިރު ބުއިން ރައްކާތެރިތޯ ބެލުމަށް ގޫގްލް ކުރި މީހުންގެ އަދަދު، ފާއިތުވި 30 ދުވަހުގެ ތެރޭގައި 5،000 އިންސައްތަ އިތުރު ވެފައިވެއެވެ.

"ލަމްޕީ ސްކިން ޑިޒީޒް" އަކީ ޒޫނޮޓިކް ޑިޒީޒެއް ނޫން ކަމަށް ވެއެވެ. މާނަޔަކީ ޖަނަވާރުންގެ ގައިން އިންސާނުންނަށް ނާރާނެއެވެ. 2017 ވަނަ އަހަރު ނެރެފައިވާ ރިޕޯޓެއްގައި އދގެ ފުޑް އެންޑް އެގްރިކަލްޗަރ އޯގަނައިޒޭޝަނުން ވެސް ވަނީ ލަމްޕީ ސްކިން ޑިޒީޒް އިންސާނުން ގަޔަށް ނާރާނެ ކަމަށް ބުނެފައެވެ. މިކަން ވަނީ އިންޑިއަން ވެޓެރިނަރީ ރިސަރޗް އިންސްޓިޓިއުޓް (އައިވީއާރުއައި) އިން ވެސް ޔަގީންކޮށްދީފައެވެ.  އައިވީއާރުއައިގެ ޖޮއިންޓު ޑައިރެކްޓަރު ޑރ. ކޭޕީ ސިންގ ބީބީސީ އަށް ވިދާޅުވި ގޮތުގައި ޖަނަވާރުންގެ ގައިން މިބަލި އެރި ކަމުގެ ހެތްކެއް އަދި މިހާތަނަށް ލިބިފައެއް ނުވެއެވެ. ނަމަވެސް ބަލިޖެހިފައިވާ ގެރިއެއްގެ ކިރު ބޯ ޅަގެރި ނުވަތަ ބަކަރިއަށް ބަލި ޖެހިދާނެ ކަމަށް އޭނާ ވިދާޅުވިއެވެ.

"ލަމްޕީ ސްކިން ޑިޒީޒް" އާބެހޭ ގޮތުން ފަތުރަމުންދާ އަނެއް ދޮގު ޚަބަރަކީ އެބަލި އެތެރެވީ ޕާކިސްތާނުން ކަމަށް ބުނެ ފަތުރާ ޚަބަރެވެ.

ހަގީގަތަކީ އެބަލި ފުރަތަމަ ފެނިފައިވަނީ 1929 ވަނަ އަހަރު ޒެމްބިޔާއިން ކަމެވެ. ފުރަތަމަ ކޮޅު ސަބްސަހާރާ އެފްރިކާގެ ގައުމުތަކުން އެކަނި ފެނުނު ނަމަވެސް ފަހުން ވަނީ އުތުރު އެފްރިކާ، މެދުއިރުމަތި، ޔޫރަޕް އަދި އޭޝިޔާގެ ބައެއް ގައުމުތަކަށް ބަލި ފެތުރިފައެވެ.

އޭޝިޔާގެ ގައުމުތަކުގެ ތެރެއިން "ލަމްޕީ ސްކިން ޑިޒީޒް" ފުރަތަމަ ފެނިފައިވަނީ 2019 ވަނަ އަހަރު ބަންގްލާދޭޝް، ޗައިނާ އަދި އިންޑިޔާއިން ކަމަށް 2020 ވަނަ އަހަރު އެފްއޭއޯ އިން ނެރުނު ރިޕޯޓެއްގައިވެއެވެ. މި ރިޕޯޓު ނެރުނު އިރު އަދި ޕާކިސްތާނުން ބަލި ނުފެންނަ ކަމަށް ވެއެވެ.

ގެރިތައް މަރުވަނީ ސަރުކާރުން ދޭ ވެކްސިނެއްގެ ސަބަބުން ކަމަށް ބުނެ ފަތުރަނީ ވެސް ދޮގު ޚަބަރެއް ކަމަށް ވެއެވެ.

"ލަމްޕީ ސްކިން ޑިޒީޒް" ޖެހި ގެރިތައް މަރުވަމުންދާތީ ސަރުކާރުން ޚާއްސަ ވެކްސިން ޕްރޮގްރާމެއް ފަށާފައިވާ ކަމަށް ވެއެވެ. މިގޮތުން އިންޑިޔާގެ އެތައް ސްޓޭޓެއްގައި މިވަގުތު ގެރިތަކަށް ވެކްސިން ޖެހުމުގެ ޕްރޮގްރާމެއް ކުރިޔަށް އެބަގެންދެއެވެ. މިގޮތުން ދެވެނީ ގޯޓްޕޮކްސް ވެކްސިން ކަމަށް ވެއެވެ. މި ވެކްސިން ޖެހުމުން "ލަމްޕީ ސްކިން ޑިޒީޒް" ޖެހުމުން 70-80 އިންސައްތަ ދިފާއު ކޮށްދޭ ކަމަށާއި މިހާރު ވެސް އެތައް މިލިއަން ގެރިއަކަށް ވެކްސިން ދެވި ގަދަވެފައިވާ ކަމަށް އިންޑިޔާގެ އޮފިޝަލުންނާ ހަވާލާދީ ލިބޭ ޚަބަރުތައް ބުނެއެވެ.

މައުލޫމާތު: ބީބީސީ ރިޕޯޓު