ތައިލަންޑްގައި އޮކްޓޯބަރ 6 ވަނަ ދުވަހު ހިންގުނު ގަތުލުއާންމަށްފަހު، ބަޑިގެންގުޅުމަށް ހުއްދަދެވޭ އުސޫލުތައް އިތުރަށް ވަރުގަދަކޮށް، އަދި މަސްތުވާތަކެއްޗާ ދެކޮޅަށް އެޅޭ ފިޔަވަޅުތައްވެސް އިތުރުކޮށް ވަރުގަދަކުރުމަށް އެގައުމުގެ ބޮޑުވަޒީރު ޕްރަޔުތު ޗަންއޮޗާ އަމުރުކުރައްވައިފިއެވެ.

ބެންކޮކާ 500 ކިލޯމީޓަރު ދުރުގައި ހުންނަ ޑޭކެއަރ ސެންޓަރއަކަށް ބަޑިހިފައިގެން ވަން ކުރީގެ ޕޮލިސް އޮފިސަރަކު ވަނީ، ބަޑިންނާއި ވަޅިން ހަމަލާދީ 36 މީހުން މަރާލާފައެވެ. މީގެތެރޭގައި 24 ކުޑަކުދިން ހިމެނެއެވެ. މިދިޔަ ހަފުތާގައި ހިނގި މި ހާދިސާއަކީ އެކަކުގެ ހަމަލާއިން މިހާގިނަ ކުދިންނާއި މީހުން މަރާލި ހާދިސާއެކެވެ.

ހޯމަ ދުވަހު ނެރުއްވި އަމުރުގައި ޕްރަޔުތު ވަނީ، އޮފިޝަލުންނާއި ކޮމިއުނިޓީތަކުގައި މަސްތުވާތަކެތި ގެންގުޅުން ހުއްޓުވުމަށް އަމުރު ކުރައްވާފައެވެ. އަދި މަސްތުވާތަކެތި ބޭނުންކުރާ މީހުންނަށް ފަރުވާދިނުމުގެ ކަންތައް ވަރުގަދަކުރުމަށްވެސް އަމުރުކުރައްވާފައިވާކަމަށް ސަރުކާރުގެ ތަރުޖަމާނު ހާމަކޮށްފައިވެއެވެ.

އަދި ބަޑިގެންގުޅުމުގެ ހުއްދަ ދެވިފައިވާ މީހުންގެ ތެރެއިންވެސް، މުޖުތަމައަށް ނުރައްކަލަކަށް ވެދާނެކަމަށް ފެންނަ މީހުންގެ ލައިސަންސް އަތުލުމަށާއި، އަދި ގަވާއިދާ ޚިލާފަށް ބަޑިވިއްކައި، އަދި ގެންގުޅޭ ފަރާތްތަކާމެދުވެސް ފިޔަވަޅުއެޅުމަށް ވަނީ އަމުރުކުރައްވާފައެވެ. ފުލުސް އޮފިސަރުންގެ ތެރެއިންވެސް ބަޑިގެންގުޅުމުގައި އެއްވެސް ވަރަކަށް ގަވާއިދާ ޚިލާފަށް ބަޑި ގެންގުޅެފިނަމަ، އެމީހުންގެ އަތުން ބަޑި އަތުލުމަށްވެސް ވަނީ އަންގަވާފައެވެ.

މީގެއިތުރުން ބަޑި ގެންގުޅުމުގެ ހުއްދަ ދެވޭ މީހުންގެ ނަފްސާނީ ދުޅަހެޔޮކަން ގަވާއިދުން ޗެކްކުރުމަށްވެސް ހަމަޖެހިފައިވާކަމަށް ޚަބަރުލިބެއެވެ.