އީރާންގައި ސަރުކާރާ ދެކޮޅަށް މިހާރު ކުރިޔަށްގެންދާ މުޒާހަރާތައް އިތުރަށް ފުޅާވަމުން ދާކަމަށް ޚަބަރު ލިބެއެވެ.

ބުރުގާ އަޅާފަ ހުރިގޮތް ކަމުނުދާކަމަށް ބުނެ ހައްޔަރު ކުރި 22 އަހަރުގެ ނޫސްވެރިޔާ، އޭގެ ދެދުވަސް ފަހުން ކުއްލިއަކަށް މަރުވެފައިވާތީ އެކަމާއި ދެކޮޅުހެދުމަށް އީރާންގެ ހައި ސްކޫލް އަންހެން ކުދިންވަނީ އިހުތިޖާޖުގެ ހަރަކާތްތަކެއް ހިންގަން ފަށާފައެވެ. މި ހަރަކާތްތަކަށް ހޮނިހިރު ދުވަހަށް ތިން ހަފްތާ ފުރިހަމަވެފައިވާ އިރު ހޮނިހިރު ދުވަހު ވެސް އީރާންގެ އެތައް ސިޓީތަކާއި އަވަށްތަކެއްގައި އެޤައުމުގެ ސަރުކާރާ ދެކޮޅަށް ގިނަ އަދަދެއްގެ ބަޔަކު، ޚާއްސަކޮށް އަންހެނުންނާއި އަންހެން ކުދިން ނުކުމެ އަޑު އުފުލާފައިވެއެވެ. އެއާއެކު ސަލާމަތީ ބާރުތަކުން ނަހަމަ ބާރު ބޭނުންކޮށް އެމީހުން މައިތިރިކުރާ މަންޒަރު ފެންނަ ވީޑިއޯތައް އާންމުވެފައިވެއެވެ.

22 އަހަރުގެ މާޝާ އަމީނީ ހައްޔަރުކޮށްފައިވަނީ ސެޕްޓެމްބަރު މަހުގެ 16 ވަނަ ދުވަހުއެވެ. އީރާންގެ "މޯރަލް" ޕޮލިސް ކިޔާ ބަޔަކު އޭނާ ހައްޔަރު ކުރީ އޭނާ ބުރުގާ އަޅާފައި ހުރީ އަޅަން ޖެހޭ ގޮތަށް ނޫން ކަމަށް ބުނެއެވެ. އެއާއެކު އޭނާގެ ބޮލަށް އަނިޔާކޮށް މަރާލީ ކަމަށް ގިނަ ބަޔަކު ގަބޫލު ކުރެއެވެ. ލީކުވެފައިވާ މެޑިކަލް ރިޕޯޓުން ވެސް އޭނާގެ ބޮލަށް އަނިޔާވެފައިވާ ތަން ފެންނަ ކަމަށް ވެއެވެ.

ސަރުކާރުން ބުނަނީ އޭނާ މަރުވެފައި ވަނީ ހާޓް އެޓޭކެއް ޖެހިގެން ކަމަށެވެ. ނަމަވެސް އެކަން އޭނާގެ އާއިލާއިން ވެސް އަދި އާންމުންގެ މީހުން ވެސް ގަބޫލެއް ނުކުރެއެވެ.

މިއާއެކު ބުރުގާ ނާޅާ ބޭރަށް ނުކުންނަ ސްކޫލް ކުދިންގެ އަދަދު ދަނީ އިތުރުވަމުންނެވެ. ބުރުގާ އަންދާލުމާއި އަދި އިސްތަށިގަނޑު ކޮށާލުން ފަދަ ހަރަކާތްތައް ވެސް އިހުތިޖާޖު ކުރާ ޒުވާނުން ދަނީ ކުރަމުންނެވެ.

ހޮނިހިރު ދުވަހު އިހުތިތާޖުގެ އެއްވުންތައް ބޭއްވި ބޮޑެތި ސިޓީތަކުގެ ތެރޭގައި ތެހެރާން، ކަރާޖް، އިސްފަހާން، މަޝާދް، ޤަޒްވިން، ކަރްމާންޝާހް، އަދި ޝިރާޒް ހިމެނޭ ކަމަށް އޭއެފްޕީ އިން ރިޕޯޓުކޮށްފައިވެއެވެ. ނޫސްވެރިންނާއި ވާހަކަ ދެއްކި ބައެއް ޒުވާނުން ބުނެފައިވާ ގޮތުގައި އެމީހުން މިހާރު ވަނީ ބިރު ފަހަނަ އަޅާ ގޮސްފައެވެ. އަދި އަންހެނުންނަށް ފުރިހަމަ މިނިވަންކަން ލިބެންދެން މި އިހުތިތާޖުގައި ދެމި ތިބޭނެ ކަމަށް އެމީހުން ބުނެފައިވެއެވެ. އަދި މިފަދަ އިބާރާތްތައް ލިޔެފައިވާ ބެނާތައް ވެސް އެމީހުން ދަނީ އުފުލަމުންނެވެ.

މުޒާހަރާ ކުރާ ފަރާތްތަކަށް އަމާޒުކޮށް ފުލުހުން ބަޑި ޖަހާ މަންޒަރު ފެންނަ ވީޑިއޯތައް ވެސް ވަނީ އާންމުވެފައެވެ. ފުލުހުންގެ ބަޑީގެ ހަމަލާތަކުން  މިހާތަނަށް 154 މީހުން މަރުވެފައިވާ ކަމަށް އީރާންގެ ހިއުމަން ރައިޓްސް އިދާރާއިން ބުނެފައިވެއެވެ. އަދި އެތައްހާސް ބަޔަކުވަނީ ހައްޔަރުކޮށްފައެވެ.

އިހުތިތާޖުތަކުގައި އޮހޮރެމުންދާ ލޭ ރަމްޒު ކުރުމަށް ތެހެރާންގެ ބައެއް ފެންއަރުވާވަޑާންތަކަށް އިހުތިޖާޖުކުރާ ފަރާތްތަކުން ހުކުރު ދުވަހު ވަނީ ރަތް ދަވާދު އަޅާފައެވެ.

މީގެއިތުރުން ޚަބަރު ލިބޭ ގޮތުގައި އީރާންގެ ސްޓޭޓް ޓެލެވިޜަންގެ ލައިވް ފީޑު ހެކުކޮށް، ލައިވް ޚަބަރު ކުރިޔަށް ދަނިކޮށް ސްކްރީނަށް ވަނީ އެނޯނިމަސްގެ މާސްކު ވެސް އަރުވާފައެވެ. އަދި އިހުތިޖާޖު ކުރާ ފަރާތްތަކުގެ މެސެޖުތައް އާންމުކޮށްފައި ވެސް ވެއެވެ. މިކަން ސަރުކާރުން ވަނީ ވަގުތުން ބަންދުކޮށްފައެވެ.