މިދިޔަ ހޯމަދުވަހު ޓީބީ ޖެހިގެން މަރުވި ބިދޭސީ ނަރުސް މަސައްކަތް ކުރި ވާދޫ ސިއްހީ މަރުކަޒުގެ މުއައްޒަފުން ޓީބީއަށް ޓެސްޓު ކުރެވެމުންދާ ކަމަށް ހެލްތު ޕްރޮޓެކްޝަން އެޖެންސީ(އެޗްޕީއޭ) އިން ބުނެފި އެވެ.
އެޗްޕީއޭގެ ޑިރެކްޓާ ޖެނަރަލް މުއުމިނާ އަބޫބަކުރު ވިދާޅުވީ ސިއްހީ މަރުކަޒުގައި މަސައްކަތް ކުރި މުއައްޒަފުންގެ އިތުރުން އެ ބިދޭސީ މީހާ އުޅުނުގޭގެ މީހުންވެސް ޓީބީއަށް ޓެސްޓު ކުރާކަމަށެވެ. މަރުވި ނަރުގެ ފަރާތުން، އެހެން ބަޔަކަށް ޓީބީ ޖެހިފައިވާކަމާމެދު އެއްޗެއް ބުނަން އެނގޭނީ ޓެސްޓުތަކުގެ ނަތީޖާ ލިބުމުންކަމަށް މުއުމިނާ ވިދާޅުވިއެވެ.
ވާދޫ ސިއްހީ މަރުކަޒުގެ މުވައްޒަފުންނާއި އެރަށުގެ ބައެއް މީހުން ޓީބީއަށް ޓެސްޓު ކުރަމުން ދަނީ އެ އަތޮޅު ތިނަދޫގައި ހުންނަ ޑރ. އަބްދުއް ސަމަދު މެމޯރިއަލް ހޮސްޕިޓަލުންނެވެ.
މިދިޔަ ހޯމަދުވަހު ބިދޭސީ ނަރުސް މީހާ މަރުވެފައިވަނީ ޓީބީއަށް ޕޮޒިޓިވްވެ ޑރ.ސަމަދު މެމޯރިއަލް ހޮސްޕިޓަލުން ފަރުވާދެމުން ދަނިކޮށެވެ.
ޓީބީ އަކީ ހަށިގަނޑުގެ ފުއްޕާ މޭއަށް ކުރިމަތިވާ ސީރިއަސް އިންފެކްޝަނެއްގެ ސަބަބުން ޖެހޭ ބައްޔެކެވެ. މި ބަލި ފެތުރެނީ ބަލި ޖެހިފައިވާ މީހަކު ކެއްސުމާއި ކިނބިހި އެޅުމުން އަނގައިން ބޭރުވާ ކުޅުތަކުގެ ސަބަބުންނެވެ.
