އޮސްޓްރޭލިޔާގެ ޓެސްމޭނިޔާގެ ބީޗްއަކަށް މަރުވެފައިވާ 14 ސްޕަރމް ވޭލް ކިޔާ ވައްތަރުގެ ބިޔަ މަސް ލައްގާފައި ވަނިކޮށް ފެނިގެން ހޯދި ހޯދުމުން މަރުވެގެން ނުވަތަ ބަލިވެފައިވާ އިތުރު 230 ވޭލް ބުދަ ދުވަހު ފެނިއްޖެއެވެ. މީހުން އާންމުކޮން ގޮސް ނޫޅޭ ސަރަހައްދެއްގެ ބީޗް އަކަށް ލައްގާފައިވާ ބިޔަ މަސްތަކުގެ ތެރޭން ދެބައިކުޅައެއްބައި މަސް ފެނުނު އިރުވެސް ދިރި ތިބި ކަމަށް ވެއެވެ. އެހެން ކަމުން މަހާބެހޭ ކަންކަން ދަންނަ ފަރާތްތަކާ އެހެން ވެސް އެހީތެރިން ހިމެނޭ ޓީމް ތައް ވަނީ ޓެސްމޭނިޔާގެ މިހިސާބަށް ފޮނުވާފައެވެ.
ޓެސްމޭނިޔާގެ މިހިސާބަށް މީގެ ދެއަހަރު ކުރިންވެސް ވަނީ ހަމަ މިފަދަ ގިނަ އަދަދެއްގެ ސްޕަރމް ވޭލް މަރުވެގެން ލައްގާފައެވެ. މިގޮތަށް ދިމާވަނީ ކިހިނެއް ވެގެން ކަން ނޭގޭ ކަމަށް މާހިރުން ބުނެއެވެ.
2020 ވަނަ އަހަރު ދިމާވި ހާދިސާގައި ވެސް 380 ވޭލް މަރުވެފައި ވީނަމަވެސް އެހީތެރިންގެ މަސައްކަތުން ސަތޭކައެއްހާ ވޭލް ސަލާމަތް ކުރެވުނު ކަމަށް ރިޕޯޓްތައް ބުނެއެވެ.
ދިރިތިއްބާ ފެނުނު ވޭލްތައް ސަލާމަތް ވޭތޯ މިފަހަރުވެސް ގިނަ މަސައްކަތްތަކެއް ކުރަމުން ދާކަމަށް ޚަބަރުތައް ބުނެއެވެ. މިގޮތުން އަވިން ސަލާމަތް ކުރުމަށް ރަޖާފަދަ އެއްޗެތި އެޅުމާ އަދި ބާލިދީތަކުގައި ގެނެސް ފެން އަޅަމުން ދިއުންފަދަ ކަންތައް އެމީހުން ދަނީ ކުރަމުންނެވެ. އެހީގެ މަސައްކަތުގައި އުޅުނު ބައެއް މީހުން ބުނެފައިވާ ގޮތުގައި އެފަދަ ބިޔަ މަސްތައް ލޮލުގެ ކުރިމަތީ މަރުވެގެން ދާތަން ފެނުމުން ވަރަށް ހިތަށް އަސަރު ކުރެއެވެ.
ވޭލް އަކީ ދިގުމިނުގައި 18 މީޓަރު އަދި ބަރު ދަނުގައި 45 ޓަނު ހުންނަހާ ބިޔަވާ މަހެކެވެ.
