އޭސީ މިލާން ބަލިކޮށް, ނަޕޯލީން އިޓާލިއަން ސެރީ އޭ ތާވަލްގެ އެއްވަނައަށް ޖެހިލައިފިއެވެ.

ނަޕީލީ އެއްވަނައިގައި އޮތީ ހަތް މެޗުން 17 ޕޮއިންޓް ހޯދައިގެންނެވެ. ދެވަނައިގައި އެޓަލަންޓާވެސް އޮތީ 17 ޕޮއިންޓާއެކުއެވެ. އެޓަލަންޓާ ވަނީ 1-0 ން ރޯމާ ބަލިކޮށްފައެވެ. ތިންވަނައިގައި އޮތީ އިންޓަރ މިލާން ބަލިކުރި އުދިނޭޒީއެވެ. އޭސީ މިލާން އޮތީ 14 ޕޮއިންޓާއެކު ފަސް ވަނައިގައެވެ. މިލާންގެ މައްޗަށް ނަޕޯލީން ކުރި ހޯދީ 2-1 ނެވެ. މެޗުގެ ދެވަނަ ހާފްގައި ނަޕޯލީއަށް ފުރަތަމަ ލަނޑު ޖަހާ ކުރިހޯދައިދިނީ ޕެނަލްޓީއަކުން ޕޮލިޓާނޯއެވެ. އެކަމަކު އޭގެ 13 މިނެޓުފަހުން ޖިރޫޑް ލަނޑު ޖަހާ މިލާނަށް އެއްވަރުކޮށްދިނެވެ. ނަޕޯލީ މެޗުން މޮޅުކޮށްދިން ލަނޑު 78 ވަނަ މިނެޓުގައި ޖެހީ ސިމެއޯންއެވެ.

އުދިނޭޒީން އިންޓަރ މިލާން ބަލިކުރީ 3-1 ނެވެ. އިންޓަރ މިލާން އޮތީ ހަތް ވަނައިގައެވެ. ޔުވެންޓަސް ވަނީ އަލަށް ޕްރޮމޯޓްވި މޮންޒާ އަތުން 1-0 ން ބަލިވެފައެވެ. މިއީ އިޓަލީގެ ފުރަތަމަ ޑިވިޝަންގައި މޮންޒާ ހޯދި ފުރަތަމަ މޮޅެވެ.