ޔުއެފާ ޔޫރޮޕާ ލީގުގައި ރޮނަލްޑޯ ފުރަތަމަ ލަނޑު ޖެހި މެޗުން މެންޗެސްޓަރ ޔުނައިޓެޑް މޮޅުވެއްޖެއެވެ.

މެންޗެސްޓަރ ޔުނައިޓެޑް މޮޅުވީ މޮލްޑޯވާގެ ޝެރިފް ޓިރާސްޕޯލްއާ ވާދަކޮށް 2-0 ނެވެ. ފުޓުބޯޅަ މެޗުގައި މެންޗެސްޓަރ ޔުނައިޓެޑަށް ލީޑް ނަގައިދިނީ 17 ވަނަ މިނެޓުގައި ޖޭޑަން ސަންޗޯއެވެ. މިއީ އިންގްލެންޑްގެ ޤައުމީ ސްކޮޑުން ޖާގަ ނުދިނުމުން ނިކުމެ, ކޯޗު ސައުތް ގޭޓަށް ސަންޗޯ ދިން ވަރުގަދަ ރައްދެކެވެ. ކެރިއަރުގައި ޔޫރޮޕާ ލީގުގައި ރޮނަލްޑޯ ފުރަތަމަ ގޯލް ޖެހީ 39 ވަނަ މިނެޓުގައި ޕެނަލްޓީއަކުންނެވެ. މިއީ އޭރިޔާ ތެރެއިން ޝެރިފްގެ ޕެޓްރިކް ޑިއޭގޯ ޑަލޮޓަށް ކުރި ފައުލަކަށް ދިން ޕެނަލްޓީއެކެވެ. ޔޫރޮޕާ ލީގުގައި މިސީޒަންގައ މެންޗެސްޓަރ ޔުނައިޓެޑް ކުޅުނު ފުރަތަމަ މެޗުގައި ރެއާލް ސޮސިއެޑާޑް އަތުން ވަނީ ބަލިވެފައެވެ. އެމެޗުގައިވެސް ރޮނަލްޑޯ ކުޅުނެވެ. ކްލަބް ކެރިއަރުގައި 700 ވަނަ ގޯލް ހަމަކުރަންވެސް މެޗުގައި ރޮނަލްޑޯއަށް ފުރުޞަތު ލިބުނެވެ. އެކަމަކު ބޭނުމެއް ނުކުރެވުނެވެ.

މިގްރޫޕްގެ އެއްވަނާގައި އޮތީ ދެ މެޗުންވެސް މޮޅުވި ރެއާލް ސޮސިއެޑާޑްއެވެ. މެންޗެސްޓަރ ޔުނައިޓެޑާއި, ޝެރިފް ޓިރާސްޕޯލްވެސް އޮތީ ތިން ޕޮއިންޓާއެކުއެވެ.