ޖަޕާނުން އިގުތިސާދު ރަނގަޅުކުރުމަށް އަޅާ ފިޔަވަޅެއްގެގޮތުން އެގައުމަށް އެތެރެވާ ޓުއަރިސްޓުން އިތުރުކުރުމަށް, ޓުއަރިސްޓުންނަށް ކަނޑައަޅާފައިވާ ބޯޑަރ ކޮންޓްރޯލަށް ލުއިދިނުމަށް ވިސްނަމުންދާކަމަށް އެގައުމުގެ މީޑިޔާ ރިޕޯޓްތައް ބުނެފިއެވެ.

ޖަޕާނުގެ ފައިސާ ޔެންގެ އަގު ވެއްޓުމުން، ގައުމަށް އެތެރެވާ ޓުއަރިސްޓުންގެ އަދަދު އިތުރުވާކަމަށް، ޑެޕިއުޓީ ޗީފް ކެބިނެޓް ސެކްރެޓަރީ ސެއިޖީ ކިހާރާ ވިދާޅުވިކަމަށް ރިޕޯޓްތައް ބުނެއެވެ.

ޔެންގެ އަގު ޔޫއެސް ޑޮލަރާ އަޅައިބަލާއިރު މިދިޔަ ހަފުތާގައި ވަނީ، ފާއިތުވި 24 އަހަރު ތެރޭގައިވެސް ދަށަށް ނުދާވަރަށް ދަށަށްގޮސްފައެވެ. މިއާއެކު ދުވާލަކު އެގައުމަށް އެތެރެވުމަށް ހުއްދަދެވޭ ޓުއަރިސްޓުންގެ އަދަދު މާދުރުނޫން މުސްތަގުބަލެއްގައި ގިނަކުރުމަށް ސަރުކާރުން ވިސްނަމުންދާކަމަށް ސެއިޖީ ކިހާރާ ވިދާޅުވިކަމަށްވެއެވެ.

ބޭރު ގައުމުތަކުން ޖަޕާނަށް އެތެރެވާ ފަރާތްތައް ފާއިތުވި ދެއަހަރު ވަރަށް ބޮޑަށް މަދުކޮށްފައިވަނީ ކޮވިޑް ފެތުރުން ހުއްޓުވުމަށެވެ. މިގޮތުން މިދިޔަ އަހަރު ބޭއްވުނު އޮލިމްޕިކް ގޭމްސްއަށްވެސް މެހެމާނުން ވަނީ ނުވައްދާފައެވެ.

ޖަޕާނުން މިމަހު ކުރީކޮޅުވެސްވެސް ވަނީ، ދުވާލަކު އެގައުމަށް އެތެރެވެވޭ ޓުއަރިސްޓުންގެ އަދަދު 20 ހާހުން 50 ހާހަށް އިތުރު ކޮށްފައެވެ. އަދި ގައިޑަކާނުލައި އުޅެވޭގޮތަށްވެސް ސަރުކާރުން ހުއްދަދީފައިވެއެވެ.

ބައެއް ރިޕޯޓްތައް ބުނާގޮތުން ސަރުކާރުން އެއްވެސް އަދަދެއް ނެތި ޓުއަރިސްޓުން އައުމަށް ހުއްދަ ދިނުމަށްވެސް ދަނީ ވިސްނަމުންނެވެ.