އެންމެ ބޮޑު އިދިކޮޅު ޕާޓީ އެމްޑީޕީގެ ޗެއަރޕާސަން ނައިބު އިދާރީކަމަށް އަލީ ނިޔާޒް ހޮވިއްޖެ އެވެ.
އެމަޤާމަށް އަލީ ނިޔާޒް އިންތިޚާބުވިކަން ރަސްމީކޮށް ކަށަވަރުވާނީ އެއިންތިޚާބުގައި ވޯޓު ނަގާއިރު މަދުވެގެން 10 ޕަސެންޓް ވޯޓު ލިބުމުންނެވެ. ނަމަވެސް އަލީ ނިޔާޒް އިންތިޚާބުވީ އެމަޤާމަށް ކުރިމަތިލެއްވީ އޭނާ އެކަނިކަމަށް ވުމުންނެވެ.
ނިޔާޒަކީ ކުރިން އެޕާޓީގެ ޗެއަރޕާސަން މާލީގެ މަޤާމްގައިވެސް ހުންނެވިއެވެ.
ޗެއަރޕާސަން ނައިބު އިދާރީގެ މަސްއޫލިއްޔަތު ތަކުގެ ތެރޭގައި ޕާޓީގެ މެމްބަރޝިޕް ކޮމެޓީއާއި ކެމްޕެއިން ކޮމެޓީ ޗެއަރކުރެއްވުން އަދި ޗެއަރޕާސަން ނެތިއްޖެ ހާލަތެއްގައި އެމަޤާމް ފުރުން ހިމެނެއެވެ.
އެމްޑީޕީގެ ކުރިއަށް އޮތް އިންތިޚާބުގައި އެޕަޓީގެ ޗެއަރޕާސަން ނައިބު މާލީ ކަމަށް 4 ބޭފުޅަކު ކުރިމަތި ލައްވާފައިވެއެވެ. އެއީ މ ބަނަފްސާވިލާ އިބްރާހީމް ވަހީދާއި ސ ފޭދޫ ނެސްޕްރޯވިލާ އަހުމަދު އަދުހަމްއާއި ހ އަނދުންގޭ ހުސައިން ޝަހީމް އަދި ހއ ތަކަންދޫ އޯޝަންވޭވް އަހުމަދު ޢަބްދުﷲ އެވެ.
މި އިންތިހާބުތަކުގައި ވޯޓުލުމުގެ ހައްގު ލިބޭނީ 13 ޖޫން ގެ ނިޔަލަށް އެމްޑީޕީގެ މެމްބަރޝިޕް ކޮމިޓީން މެމްބަރެއްގެ ގޮތުގައި ބަލައިގެންފައިވާ ފަރާތްތަކަށް ކަމަށް އެމްޑީޕީގެ އިއުލާނުގައި ބުނެފައިވެއެވެ.
