ނަޒަރު ގޮސް ހުއްޓުނީ އުރުދުންގެ ވެރިރަށް އައްމާންގައި ތޮއްޖެހިފައި ވާ މުސްކުޅި އަވަށެއްގައި، ކާރު ޕާކު ކުރަން ހާއްސަ ކޮށްފައި އޮތް ކުޑަ ސަރަހައްދަކަށެވެ.
ހަފުތާގެ މަސައްކަތު ދުވަސްތަކުގެ ދުވާލުގެ ވަގުތުތަކުގައި އެއީ ކާރޫބާރު ބޮޑު، ޕާކިންގް ޒޯންއެކެވެ. ރޭގަނޑުގެ ވަގުތުތަކާއި ހަފުތާ ބަންދުގައި އެއީ އަމިއްލަ ވަޒަނެއް އޮތުމުގެ ނަޞީބުން މަޚްރޫމު ވެފައިވާ ރެފިއުޖީންގެ ހިތްތަކަށް ތަސައްލީއެއް ހޯދާލާ، އުފާވެރި ވަގުތުކޮޅެއް ހޭދަކޮށްލުމަށް ބޭނުން ކުރާ ވަގުތީ ފުޓުބޯޅަ ދަނޑެކެވެ.
ޔަމަނަށް ނިސްބަތްވާ އަހުމަދު ޢަބްދުއްރަޙްމާން ޢުރުދުންއަށް ބަދަލުވީ މީގެ 8 އަހަރު ކުރިންނެވެ. ތެލުގެ ސިނާއަތުގައި އަދާ ކުރަމުން ދިޔަ ވަޒީފާގެ އިތުރުން، ހިތު ލޯބި ދެވިފައި ވާ މީހުންވެސް ދޫކޮށްފައެވެ. ސާފު ކުރާ މީހެއްގެ ވަޒީފާ އަދާ ކުރަމުން އަންނަ، އުމުރުން 29 އަހަރުގެ ޢަބްދުއްރަޙްމާންއަށްވެސް، އެންމެ ފުރަތަމަ އެކަން ވީ، ކުރަން މާ ފަސޭހަ ކަމަކަށް ނޫނެވެ. އެކަމަށް ހޭނުމަށް އެތައް ވޭނެއްގައި އުޅުނެވެ. ނަމަވެސް، ފުޓުބޯޅަ ކުޅެން ފެށުމާ ހަމައަށެވެ.
އުރުދުންއަށް އައި ފަހުން މަގޭ ހުރިހާވެސް ކަމަކީ މި ކުޅިވަރު. މަސައްކަތަށް ފަހު ވަރުބަލި ކަމާއި ހާސް ކަން ފިލުވާލާ، ސަކަރާތް ޖަހާ، މަޖާ ވަގުތުތަކެއް ހޭދަކޮށްލަން އަހަރަމެން ފުޓުބޯޅަ ކުޅެނީ.އަހުމަދު ޢަބްދުއްރަޙްމާން؛ އުރުދުންގައި ދިރިއުޅޭ ޔަމަނުގެ ރެފިއުޖީއެއް
ކާރު ޕާކު ކުރަން އޮތް އެ ޒޯންއަކީ ޔަމަނުގެ އިތުރުން ސޯމާލިއާ، ސޫދާން، ޢިރާޤް އަދި ސޫރިޔާއާއި އިތިއޮޕިއާގެ ރެފިއުޖީންގެ އިތުރުން އުރުދުންގެ ޒުވާނުންވެސް މިއަދު އެއްތަނަކުން ބައްދަލުވާ، ޘަޤާފީ ސިންދަފާތުކަމުގެ މުއްސަނދި ދަނޑަކަށް ވަނީ ވެފައެވެ. ބަދަހި މުޖުތަމައެއްގެ ގޮތުގައި އެމީހުންގެ މެދުގައި ގުޅުންތައް ބަދަހިވެފައި ވާ މަންޒަރު ބަލާލި ކޮންމެ މީހެއްގެ ހިތަށް ހަމަޖެހުމާއި އުފާވެރިކަން ގެނުވައެވެ.
"އަހަރަމެންނަކީ އެއް ބައެއް. ތަފާތު ކުރުމެއް ނެތް. އެކަމާ ވަރަށް ގަޔާވޭ. އަހަރަމެންނަށް ކުރިމަތިވާ ހާސްކަން، އެކަކު އަނެކަކާ ހިއްސާކުރަން. ސިއްރު ހިފެހެއްޓޭ. އެންމެ ކަމުދަނީ، ހަމަ ތަފާތު ކުރުން ނޯންނާތީ. އެއްވެސް މީހަކު ނުބުނާނެ ކަލޭތީ ސޯމާލިއާ މީހެކޭ، އޭނަ އެއީ އުރުދުން މީހެކޭ ނޫނީ ޔަމަނު މީހެކޭ. އަހަރަމެންނަކީ ހަމަ އެއްބައެއް. الحمد للهކަރީމް ސަލީމް؛ އުރުދުންގައި ދިރިއުޅޭ ޔަމަނުގެ ރެފިއުޖީއެއް
އެމީހެއްގެ ދިރިއުޅުން އުޖާލާ ވާނީ، އެމީހަކު އެކަމަށް މަސައްކަތް ކުރި މިންވަރަކުން ކަން، އުރުދުންގައި ދިރިއުޅެމުންދާ ރެފިއުޖީންގެ ދިރިއުޅުމަށް ބަލާލުމުން ކިތަންމެހާވެސް ރަނގަޅަކަށް އެނގިގެން ދެއެވެ. ވީ ކޮންމެ ހާލެއްގައި ވާން ދޫކޮށްލައިގެން ހުރުމުގެ ބަދަލުގައި، ދިރިއުޅުން ކޮޅަށް ޖެހުމަށް، މަސައްކަތް ކުރަންވީ ކަން އަންގައިދެއެވެ.
ކޮންމެ ކަމެއް އެންމެ ފުރިހަމައަށް، ނުވި ކަމުގައި ވީ ނަމަވެސް، ލިބެން އޮތް ވަސީލަތެއްގެ ބޭނުން ހެޔޮ ގޮތުގައި ހިފައިގެން ހީވެސް ނުކުރާހާ ބޮޑެތި ފައިދާތަކެއް ކޮށްފާނެކަން، ޕާކިންގް ޒޯންގައި ފުޓުބޯޅަ ކުޅެމުންދާ މި ޒުވާނުންގެ ވާހަކަތަކުންވެސް އަންގައިދެއެވެ.
މިތަނަށް އައިސްގެން އަހަރަމެންގެ މެދުގަ ގުޅުންތައް ބަދަހިވޭ. އަޚުވަންތަ އެކުވެރި ގުޅުންތަކެއް. އެކަކު އަނެކަކާ ވަރަށް ގުޅޭ. މިތަނުން ނުވަތަ އެހެން ތާކުންވިއަސް މީހަކަށް އަނިޔާއެއް ކަމެއް ވެގެން އެހީއެއް ބޭނުންވެއްޖިއްޔާ، ތެދެއް، އަހަރަމެންނަށް އެންމެ ފުރިހަމައަށް އެހީތެރި ނުވެވިދާނެ، އެކަމަކު، ވީ އެންމެ ފުރިހަމައަކަށް އެމީހަކަށް ކުރިމަތިވި މައްސަލަ ނޫނީ ލިބުނު އަނިޔާއަށް ލުޔެއް ހޯދާ ދެވޭތޯ އަހަރަމެން މަސައްކަތް ކުރަން. އެމީހުންނަށް އެހީވާން، ކޮންމެ މީހެއްގެ އަތުންވެސް 1 އުރުދުން ދީނާރު ނުވަތަ ބައި ދީނާރު ވަރު ނަގަން.ޚާލިދު މުޙައްމަދު؛ ސޯމިލިއާގެ ރެފިއުޖީއެއް-
އުރުދުންގައި ދިރިއުޅޭ ރެފިއުޖީންނަށް ބަލާއިރު، ރެފިއުޖީންނާ ބެހޭ އދގެ އިދާރާގައި ދަފުތަރު ކޮށްފައިވާ ރެފިއުޖީންގެ އަދަދު 760000 އަށްވުރެ މައްޗަށް އަރައެވެ. އޭގެ ތެރޭގައި އެންމެ ގިނައީ ސޫރިޔާގެ ރެފިއުޖީންނެވެ. އަދި 83 ޕަސެންޓް މީހުން ދިރިއުޅެމުން ދަނީ ރެފިއުޖީ ކޭމްޕުތަކުން ބޭރުގަ، ތަރައްގީ ވެފައި ވާ ސަރަހައްދުތަކުގައި ކަން ވެސް ފާހަގަ ކުރަން ޖެހެއެވެ.
