ފާއިތުވި ހަފުތާގައި ކޮވިޑް-19 ބޫސްޓަރ ދެ ވަނަ ޑޯޒް 45 މީހުން ޖަހާފައިވާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކުން ދައްކައިފިއެވެ.

އެޗްޕީއޭއިން އެންމެފަހުން އާންމުކޮށްފައިވާ ތަފާސްހިސާބުތަކަށް ބަލާލާއިރު އޮގަސްޓް 27 ގެ ނިޔަލަށް ކޮވިޑް ވެކްސިންގެ ދެވަނަ ބޫސްޓަރ ޑޯޒް ޖަހާފައިވަނީ 1183 މީހުންނެވެ. ބޫސްޓަރ ފުރަތަމަ ޑޯޒް 166،603 މީހުން ޖަހާފައިވެއެވެ.

ކޮވިޑް-19ން ރައްކާތެރިވުމަށް ވެކްސިންގެ ތިން ޑޯޒް ފުރިހަމަކޮށްފައިވާ މީހުންގެ ތެރެއިން 65 އަހަރުން މަތީގެ މީހުންނާއި, ބަލިޖެހުމުން ނުރައްކާ ބޮޑުވެދާނެކަމަށް ބެލެވޭ މީހުންނަށް ހަތަރުވަނަ ޑޯޒެއް ޖެހުމަށް ނިންމައި އެކަން އެޗްޕީއޭއިން ހާމަކޮށްފައިވަނީ ޖޫން މަހުގެ 22 ވަނަ ދުވަހުއެވެ.

ރާއްޖެއިން މިހާތަނަށް ކޮވިޑް-19 ވެކްސިންގެ ފުރަތަމަ ޑޯޒް 399،069 މީހުން ޖަހާފައިވާއިރު ދެވަނަ ޑޯޒް 384،879 މީހުން ޖަހާފައިވެއެވެ.