ސްކޮޑް ވަރުގަދަ ކުރަން އުނދަގޫތަކެއް ކުރިމަތިވި ޗެލްސީ ލީޑްސް އަތުން ބޮޑު ބައްޔެއް ވެއްޖެއެވެ. ލީޑްސް ޔުނައިޓެޑުން ޗެލްސީ ބަލިކުރީ 3-0 ނެވެ.

ލީޑްސް ޔުނައިޓެޑުން ފުޓުބޯޅަ މެޗުގެ ފުރަތަމަ ހާފްވެސް ނިންމާލީ ދެ ލަނޑުގެ ލީޑަކާއެކުއެވެ. ފުރަތަމަ ލަނޑު ޖަހާ ކުރިހޯދައިދިނީ 33 ވަނަ މިނެޓުގައި އާރޮންސޮންއެވެ. މިއީ ކީޕަރު މެންޑީ ހަދިޔާކުރި ގޯލެކެވެ. އޭގެ ހަތަރު މިނެޓުފަހުން ދެވަނަ ލަނޑު ޖެހީ ރޮޑްރީގޯއެވެ. ތިންވަނަ ލަނޑު ދެވަނަ ހާފްގައި ޖެހީ ހަރިސަންއެވެ. ލީޑްސް ވަނީ ފުރަތަމަ ތިން މެޗުން ހަތް ޕޮއިންޓް ހޯދާފައެވެ.

މެޗު ޗެލްސީން ނިންމާލަން ޖެހުނީ މިސީޒަންގައި ޓީމާ ގުޅުނު ކަލީދޫ ކުލިބާލީއަށް ދެވަނަ ރީނދޫކާޑާއެކު ރަތްކާޑް ދެއްކުމުންނެވެ. އެކަމަކު އޭރު މެޗު ނިމެން އޮތީ ހަ މިނެޓެވެ.

ލީގުގައި ބްރައިޓަން ވަނީ 2-0 ން ވެސްޓްހޭމް ބަލިކޮށް ތިން މެޗުން ހަތް ޕޮއިންޓް ހޯދާފައެވެ.