އިސްލާމް ދީނަށް ފާޑުކިޔައި ލިޔުންތައް ލިޔެފައިވާ ސަލްމާން ރުޝްދީއަށް ހަމަލާ ދިންކަމަށް ތުހުމަތު ކުރެވޭ މީހާއަކީ އިރާނުގެ ކުރީގެ ރޫހާނީ ލީޑަރ އާޔަތުﷲ ޚުމައިނީއަށް ތާއީދުކުރާ މީހެއްކަމަށް އެމީހާ ބުނެފިއެވެ.

ނިއު ޔޯކް ޕޯސްޓަށް ވީޑިއޯ މެދުވެރިކޮށް ދިން އިންޓަރވިއުގައި ސަލްމާން ރުޝްދީއަށް ހަމަލާދިންކަމުގެ ތުހުމަތުގައި ހައްޔަރުކޮށްފައިވާ ހާދީ މަތާރު ބުނީ އޭނާ އާޔަތުﷲ ޚުމައިނީ އަށް އިޚުތިރާމްކުރާ ކަމަށެވެ. އަދި ސަލްމާން ރުޝްދީ އޭނާގެ ލިޔުންތަކުގެ ބޭނުންކޮށްގެން އިސްލާމްދީނަށް އިހާނެތިކޮށް ކަންކުރާކަމަށް އޭނާ ގަބޫލުކުރާކަމަށެވެ.

އިރާނުން ވަނީ ސަލްމާން ރުޝްދީއަށް ދިން ހަމަލާގައި އެގައުމުގެ އެއްވެސް ބައިވެރިވުމެއް ނޯންނާނެކަމަށް ބުނެފައެވެ.

ސަލްމާން ރުޝްދީއަކީ މަރާލަންޖެހޭ މީހެއްކަމަށް ބުނެ 1989ގައި ޚުމައިނީ ވަނީ ފަތުވާއެއް ނެރެފައެވެ. މިހާތަނަށްވެސް އިރާނުން އެފަތުވާ ބާތިލުކޮށްފައެއްނުވެއެވެ.

ޖަލުގައި ހުރެގެން ނިއު ޔޯކް ޕޯސްޓާ ވާހަކަދައްކަމުން ހާދީ ބުނީ އާޔަތުﷲ އަކީ ވަރަށް ރަނގަޅު މީހެއްކަމަށް އޭނާ ގަބޫލުކުރާ ކަމަށާއި އާޔަތުﷲ އަށް އިހުތިރާމްކުރާކަމަށެވެ.

ރުޝްދީއަށް ހަމަލާ ދީފައިވަނީ ހުކުރު ދުވަހު އެމެރިކާގެ ޝަޓޯކުވާ އިންސްޓިޓިއުޝަނުގައި ލެކްޗަރެއް ދިނުމަށް ގޮސް ހުއްޓައެވެ. އޭނާ ސްޓޭޖަށް އަރަން ދިޔަ ވަގުތު މީހަކު ފަހަތުން ގޮސް ހަމަލާ ދިންކަމަށް މަންޒަރު ދުށް މީހުން ބުނެއެވެ.

ސަލްމާން ރުޝްދީއަށް ފަރުވާދެމުން ދަނީ ވެންޓިލޭޓަރުގައި ކަމަށް އޭނާގެ އޭޖެންޓް އެންޑްރޫ ވައިލީ ވަނީ ކުރިން ބުނެފައެވެ. ނަމަވެސް މިހާރު ވެންޓިލޭޓަރުން ނަގާފައިވާކަމަށާއި ވާހަކަދެއްކޭކަމަށް ސަލްމާން ރުޝްދީގެ އެޖެންޓް ވަނީ ބުނެފައެވެ. ނަމަވެސް ހަށިގަނޑުގެ 10 ތާކަށް ވަޅި ހަރާފައިވުމުގެ ސަބަބުން އުމުރުން 75 އަހަރުގެ ސަލްމާން ރުޝްދީއަށް ދެން އުޅެންޖެހޭނީ އެޒަޚަމްތަކުގެ ސަބަބުން ލިބިފައިވާ ގެއްލުންތަކާއެކު ކަމަށާއި އެއް ލޮލުގެ ފެނުން ގެއްލުމުގެ ފުރުސަތުވެސް އެބައޮތްކަމަށް އެޖެންޓް ވަނީ ބުނެފައެވެ.

މިހަމަލާއާ ގުޅިގެން އީރާންގެ މީޑިޔާގައި އެކިގޮތްގޮތަށް ވާހަކަތައް ހުރި ނަމަވެސް، ހޯމަ ދުވަހު ފޮރިން މިނިސްޓްރީގެ ތަރުޖަމާނު ނާސިރު ކަންނާނީ ވަނީ، އެހަމަލާއާ އީރާނާ ގުޅުވުމުގެ ހައްގެއް އެއްވެސް ފަރާތަކަށް ނޯންނާނެކަމަށް ބުނެފައެވެ. ތަރުޖަމާނު ބުނީ، ބަސްބުނުމުގެ މިނިވަން ކަމުގެ ނަމުގައި އިސްލާމް ދީނަށް އިހާނެތިވާގޮތަށް ސަލްމާން ރުޝްދީއަށްވެސް ލިއުންތައް ނުލިޔެވޭނެކަމަށެވެ. އަދި މިހަމަލާއާ ގުޅިގެން އީރާނުން ކުށްވެރިކުރާނީ ހަމައެކަނި ލިއުންތެރިޔާއާއި އޭނާގެ ސަޕޯޓަރުން ކަމަށާއި، މިހަމަލާއާއި ގުޅޭގޮތުން މީޑިޔާގައި ހާމަވި އެއްޗެއް ފިޔަވައި އެހެން އެއްވެސް މައުލޫމާތެއް އީރާނަށް ނޭނގޭކަމަށްވެސް ބުނެފައިވެއެވެ.

ނިއުޔޯކް ޕޯސްޓާ ވާހަކަދައްކަމުން ހާދީ ވަނީ އިރާނުގެ ރިވޮލިޔުޝަނަރީ ގާޑާ އެއްވެސް ގުޅުމެއް ނޯންނަކަމަށް ބުނެފައެވެ. އަދި ސަލްމާން ރުޝްދީ ލިޔެފައިވާ "ދަ ސެޓަނިކް ވަރސަސް"ގެ ކުޑަ މިންވަރެއް ކިޔާފައިވާކަމަށާއި ސަލްމާން ރުޝްދީގެ ވީޑިއޯ ޔޫޓިޔުބުން ބަލާފައިވާކަމަށެވެ. އަދި ރުޝްދީ އަކީ އޭނާ އަށް އެއްގޮތަކަށްވެސް ކަމުދާ މީހެއް ނޫންކަމަށް ވަނީ ބުނެފައެވެ.

1988 ވަނަ އަހަރު  އޭނާ ލިޔުނު ލިޔުނު ފޮތް "ދަ ސެޓަނިކް ވަރސަސް"ގެ ސަބަބުން ފާއިތުވި 30ށް ވުރެ ގިނަ އަހަރު އޭނާއަށް ވަނީ މަރުގެ އިންޒާރުތައް ލިބިފައެވެ. އެއާއެކު އޭނާ އުޅެމުންދިޔައީ ފިލައިގެންނެވެ.