ޓްރާންސްފަރ މާކެޓުގައި ކުޅުންތެރިން ގަތުމަށް ބޭނުންވާ ފައިސާ ހޯދުމަށް ބާސެލޯނާއިން ހަރުމުދާ ވިއްކާތީ ލިވަޕޫލްގެ ކޯޗު ޔާގަން ކްލޮޕްގެ ފާޑުކިއުން ބާސެލޯނާއަށް އަމާޒުވެއްޖެއެވެ.

ޓީވީ އިންޓަރވިއުއެއްގައި ކްލޮޕް ބުނީ ބާސެލޯނާއިން އާމްދަނީ ހޯދުމަށް އެކުރާ ކަންތަކުން އޭނާ ހައިރާންވާކަމަށެވެ. އަދި ޓީމުގައި ޚަރަދުކުރާނެ ފައިސާ ނެތްނަމަ ބޮޑު އަގުދީފައި ކުޅުންތެރިން ނުގަތުމަކީ އެންމެ ބުއްދިވެރި ގޮތްކަމުގައި ކްލޮޕް ފާހަގަކުރިއެވެ. މީގެ އިތުރުން އޭނާ ބުނީ ބާސެލޯނާއިން މިހާރު ކަންތައް ކުރަމުން އަންނަ ގޮތް އޭނާއަށް އެއްވެސް ގޮތަކަށް ފަހުމްނުވާ ކަމަށެވެ.

ބާސެލޯނާއިން ވަނީ މި ޓްރާންސްފަރ މާކެޓުގައި ކުޅުންތެރިން ހޯދުމަށް ޓީވީ ރައިޓްސްއިން ބޮޑު ބައެއް ވިއްކާލާފައެވެ. އެކްލަބުން ވަނީ ދެފަހަރެއްގެ މަތިން ޓީވީ ރައިޓްސްގެ ޖުމްލަ 25 ޕަސެންޓު ސިކްސްތު ސްޓްރީޓް ކުންފުންޏަށް 25 އަހަރުގެ މުއްދަތަކަށް ވިއްކާލާފައެވެ. މީގެ އިތުރުން އެޓީމުން ވަނީ ބާސާ ސްޓޫޑިއޯސްގެ 24.5 ޕަސެންޓު އޯފެއުސް މީޑިއާއަށް ވިއްކާލާފައެވެ.

ކްލަބުގެ ހަރުމުދާ ވިއްކައިގެން ލިބުނު ފައިސާއިން ބާސެލޯނާ ވަނީ ރޮބަޓް ލެވަންޑޯސްކީފަދަ، ދުނިޔޭގެ ފެންވަރުގައި ފާހަގަކުރެވޭ މޮޅެތި ކުޅުންތެރިން އެޓީމަށް ގެންގޮސްފައެވެ. ބާސެލޯނާގެ ރައީސް ލަޕޯޓާ ގަބޫލުކުރާގޮތުގައި މިއީ މާލީ ހާލަތު ދަށްވެފައިވާ ކްލަބުގެ ކުރިމަގަށް އެޅޭ ރަނގަޅު ފާލެކެވެ.