މީހުން ބުނެއުޅެއެވެ. ގެންދަވާނީ ދައްކަވަން ހުރި ތަނެއް ދައްކަވާފައެވެ. ދުނިޔެ ހިނގާނީ އެއްވަތު މަތިން އަނެއް ވަތު ދަށުން ވިޔާ ތޮށަލި ދުޅައަށެވެ. ރަތްވިލާ އޮއްސޭ ފަދައިން ބަދަލުވާ ކުލަތައް އަބަދުވެސް އެގޮތުގައި ބަދަލުވެ އާވެދެއެވެ. ތެލާއި ފެނާ އެއް ނުވިއަސް އެ ދެ ބާވަތް އެއް އިންޖީނަކަށް އަޅައިގެން ކަރަންޓް އުފެއްދޭ ކަމީ ދޮގު ނުކުރެވޭނެ ތެދު ހަޤީގަތެކެވެ.
އޭގެ އެންމެ ރީތި އެއް މިސާލު އެ ފެނުނީ ބުދަ ދުވަހުގެ ރޭ ވެލާނާ އިންޓަނޭޝަނަލް އެއާޕޯޓުންނެވެ. ރަސްމީ ފާލަން ދޮށުން ފެންނަން ތައްޔާރުވިޔަސް އެމްއެމްއޭ ދޮށުންނެވެ. ކުރީގެ ރައީސް މައުމޫން ޢާއިލީ ބޭނުމެއްގައި ރާއްޖެއިން ބޭރުގައި ގިނަ ދުވަސްތަކެއް ހޭދަކުރައްވާފައި ވަޑައިގެންނެވުމުންނެވެ. އެފެނުނީ ތަފާތު މަންޒަރެކެވެ. ބޮޑުތަނުން ތަފާތު ކުލައެކެވެ.
ރައީސް މައުމޫންގެ ދިގު ތިރީސް އަހަރުގެ ވެރިކަމުގައި ލައްކަ ކަންކަން ހިނގާފައި ހުންނާނެއެވެ. ތަރައްޤީއަށް ކުރެވިފައި ހުރި ކަންކަމާއި ވެރިކަމުގައި ފެނުނު ބައެއް އެހެން ކަންކަމެވެ. ގާތުގައި ގެންގުޅުއްވި ބޭފުޅުން އިންތިހާއެވެ. އެވެރިކަމުން ނުގޮތަކަށް ނުވަތަ ވަޒީފާ އާއި ގާތްކަމުން ލިބުނު ނަފާވެރިކަން ލިބުނު ބައެކެވެ. އެއީ އެމަނިކުފާނުގެ ސަރުކާރުގެ މަތީފަޑީގައި އޭރު ތިއްބެވި ފަރާތްތަކާއި އެވެރިންގެ އާއިލާތަކެވެ. މިއަދު ސަރުކާރުގައި ތިއްބެވި ފަރާތްތައް ހިމެނެނީ ބޮޑަށް އެ ކެޓަގަރީގައެވެ.
ހަމަ އެބީދައިން ކަންކަން އޮތް ގޮތުންނާއި ޤާނޫނީ އޮނިގަނޑާއި ދިވެހިންގެ ބޯދާ ވިސްނުންތަކުގެ ތެރެއިން ކުރެވުނު ގޮތަކަށް ކުރަން ހިތިކަށް ލިބިދީފައިވާ ވެރިކަމެއްގައި ކުރެވުނު ބައެއް ކަންކަން ގޯސްވި ބަޔަކުވެސް އުޅެއެވެ. އެވެރިކަމާ ދެކޮޅުވި ބައެކެވެ. ޑިމޮކްރަސީ ހަމަތަކުގެ މަތިންވެސް އެ ވެރިކަން ބަދަލުކުރަން އުޅުނު ބަޔަކުވެސް ތިބޭނެ އެވެ. އެކަން ކަމުގައި އިންސާފުންނާއި އަދި ސިޔާސީ ގޮތުން ވެސް އަހުވަ ލިބުނު ނުވަތަ އަނިޔާއެއް ތަހައްމަލްކުރަން ޖެހުނު ބަޔަކު އުޅޭނެއެވެ. މައިގަނޑު ގޮތެއްގައި މިބައިގައި ހިމެނެނީ އޭރުވެސް އިދިކޮޅު އަދި މިހާރުވެސް އިދިކޮޅުން މަސައްކަތްކުރާ ގިނަ މީހުންނެވެ.
ދިގު ތިރީސް އަހަރުގެ ވެރިކަމުގައި އެ މަނިކުފާނަށް މީހުން ކުރި ގަދަރާއި ލިބިދީފައި އޮތް ތާއީދާއެކު އުޅުއްވީ ޝާހީ ދިރިއުޅުމެކެވެ. މީހުން ބަލައިގަތީ އިއްޒަތުގައެވެ. އެ މަނިކުފާނު ތާކަށް ވަޑައިގަންނަވާނަމަ ކުރެވޭ ޒީނަތް އިންތިހާއެވެ. ސަލާންގަލާންކޮށް ދިދަ ހޫރުވުމުގައި އެވަރެއް ނޯވެއެވެ. ތިޔައީ ޒައީމޭ އަދު ލޮބުވެތިވި ދިވެހި ޤައުމު ފަޚުރުވެރިވާއޭ ބުނެ އަޑުހަރުކޮށް ޖެހޭ ލަވަޔާއި ޖަހާ ބިރު ހުންނާނީ ގުގުމާފައެވެ.
މިކަންކަމުގައި އޭރު އުޅުނީކީ މަދުބައެއް ނޫނެވެ. އަނެއްކާ އާދައިގެ ބައެއް ވެސް ނޫނެވެ. އެހެން ނަމަވެސް އެކަން ކުރުމުގައި އުޅުނީ މިހާރު ސަރުކާރުގައި ތިއްބެވި ބޭފުޅުންނެވެ. ޚާއްޞަކޮށް ސަރުކާރުގެ އެންމެ މަތީ ފަޑިއެވެ. ރައީސް މައުމޫންގެ މުއްފަތުން އެހާ ހިސާބަށް އާދެވުނު މީހުންނެވެ. އެމަނިކުފާނު އަތުކުރީގައި ލައްވައިގެން ގެނެސް ސިޔާސީ މައިދާނަށް ނެރެ އެގޮނޑީގައި ބޭންދެވި މަޖިލިސް މެންބަރުންނެވެ. ނިހާނާއި އަބްދުއް ރަހީމެއް ކިޔާނެ ކަމެއް ނެތެވެ. ޚުދު ރައީސް ޔާމީނަށް ވެސް އެ މަޤާމާ ވައި އެޅޭވަރުވެސް ވީ ރައީސް މައުމޫންގެ ސަބަބުންނެވެ. އެހެން ކަމުން އޭރު ނަގާ ކިޔާ އުޅުނީ އެ ބޭފުޅުންނެވެ.
PPM ge Raees, Raees Uz @maumoonagayoom Raajje vadaigannavaifi. Gulhifaivaa Siyaasee Party thakuge Issverin Airport gai pic.twitter.com/KNSDHpI0Yu
— MDP Secretariat (@MDPSecretariat) June 14, 2017
މަންޒަރު ބަދަލުވީ ބުދަ ދުވަހުއެވެ. ގިނަ ދުވަސްތަކެއް ވަންދެން ބޭރުގައި ހުންނެވުމަށް ފަހު ވަޑައިގެންނެވުމުން ފެނުނީ މުޅިން އެހެން މަންޒަރެކެވެ. ކުލަ ބަދަލުވެއްޖެއެވެ. ފޮޓޯ ތަފާތުވެއްޖެއެވެ. މުޅިން އެހެން ރާގެކެވެ. މިފަހަރު އެ މަނިކުފާނަށް މަރުހަބާ ކިޔުމަށް ދިޔައީ އިދިކޮޅު މެމްބަރުންނެވެ. އެމްޑީޕީ އާއި އަދާލަތާއި ޖޭޕީ އެވެ. ސަރުކާރުގެ ބޭފުޅުންނާއި ޕީޕީއެމް ޕީޖީ ގުރޫޕްގެ ބަދަލުގައި އެމަނިކުފާނުގެ އިސްތިޤްބާލްގައި ތިއްބެވީ ރައީސް މައުމޫނާ ކުރީގެ ސިޔާސީ ވާދަވެރިންނެވެ. ސިޔާސަ ވެގެން ސިޔާސީ އަނިޔާ ލިބުނު މީހުންނެވެ. އަތް ޖަހަމުން ދިޔައީ އިދިކޮޅު މީހުންނެވެ.
އެކަމަކު ބުދަ ދުވަހުގެ ރެޔަކީ ތަފާތު ދުވަހެކެވެ. ރައީސް މައުމޫނަށް ތާރީޚީ ރެއެކެވެ. ހަމަގައިމުވެސް އެމަނިކުފާނަށް ވަރަށް ބޮޑު ހިތްހަމަޖެހުމެއް ލިބޭނެ ރެއެކެވެ. އެހެން ނުވާންވީ އެއްވެސް ސަބަބެއް ނެތެވެ. އެ މަނިކުފާނުގެ މަސައްކަތުން ވެރިކަމަށް ވަޑައިގެންނެވި ކޮއްކޯފުޅާއި އެ މަނިކުފާނުގެ ސަބަބުން ސިޔާސީ އިސްބޭފުޅުންނަށް ވެގެންދިޔަ މީހުން އެ މަނިކުފާނަށް ދިނީ ބޮޑުތަނުން ދޯކާއެވެ. ކަންވެ ނިމުނީމާ އެމަނިކުފާނު އެއް ފަރާތް ކުރީއެވެ. އެމަނިކުފާނުގެ ޒަމާންވީ ލެގެސީ ވެއްޔާ މޮޑެލާ އެމަނިކުފާނަކީ އެއްވެސް މީހެއް ނޫންކަމަށް ހެދީއެވެ. މުޅި އެމަނިކުފާނުގެ އަޑު ކަނޑުވާލާ އެމަނިކުފާނު މަންޒަރުން ވެސް ގެއްލުވާލީއެވެ. އެކަން އެފުށް މިފުށަށް ޖަހާލާ އެކަން އެބަދަލު ކޮށްލި ރެއަކީ ބުދަ ދުވަހުގެ ރެއެވެ. އިދިކޮޅު ފަރާތްތަކުން އެމަނިކުފާނުގެ އަތުގައި ހިފީއެވެ. އެމަނިކުފާނުގެ މަސައްކަތް ބޭނުންތެރިއޭ ބުނެ އަނެއްކާވެސް ރައީސް މައުމޫންގެ ނަން ފަވާލަ ދިނީއެވެ. ދިވެހިރައްޔިތުން އެދެނީ މަނިކުފާނުގެ އެހީތެރިކަމޭ އަދިވެސް މިކަން ކުރެވޭނެ އެއްބޭފުޅަކީ ރައީސް މައުމޫނޭ ބުނެ އެމަނިކުފާނާއެކު ދެމިތިބިކަން ހާމަކޮށްދިނީއެވެ. އެގޮތުން އެފެނުނީ ތަފާތު ފޮޓޯއެކެވެ. ތަފާތު މަންޒަރެކެވެ.
ދެން އޮތީވެސް ތަފާތު ކަމެވެ. އިދިކޮޅު ފަރާތްތަކާއި ރައީސް މައުމޫނާ އެއް އޮޑިއެއްގައި މަސައްކަތް ކުރައްވަން ފެއްޓެވި ތަން ފެނުމެއް ނޫނެވެ. އެމަނިކުފާނު ވެރިކަމަށް ގެންނެވި އެ މަނިކުފާނުގެ ކޮއްކޯފުޅާއި އިހުގާތުގައި ތިބި މީހުން ނުފެނުމުންނެއްވެސް ނުމެ ނޫން މެއެވެ. ރައީސް މައުމޫންގެ ހިތްވަރުފުޅު ގަދަކަމެވެ. އުރައިން ދަމައިގެންފައިވާ މިޔައެއްގެ ކަނޑި މައްޗަށް ޖެހިލުމެއް ނެތި ވަޑައިގެންނެވީމައެވެ. ސަރުކާރާ ދެކޮޅަށް އެއްޗެއް ބުނާ މީހުންނަށް ވާގޮތް ރޯމާ ދުވާލު ފެންނަމުންދާއިރުވެސް ބޭރުގައި އަރާމުގައި ހުންނެވުމެއް ނެތި އަމިއްލަ ޤައުމަށް ވަޑައިގެން އިސްލާހީ މަސައްކަތުގައި އަރުވާ ޖެއްސެވީތީއެވެ. ހިންގަވާފައި ވަޑައިގެން ސަޕޯޓަރުންނަށް އެއަޅާލި ހަނާ އެއީ ހަމަ ލައްކަ ވާހަކައެވެ. އިސްލާހަށް ނިކުމެތިބި ފަރާތްތަކަށް ދެއްވި ހިތްވަރުގަދަ މެސެޖެކެވެ.
ކޮންމެއަކަސް ރައީސް މައުމޫންގެ އެނބުރި ވަޑައިގަތުމާއެކު އެފެނުނީ އާދައިގެ ފޮޓޯއެއް ނޫނެވެ. މުޅިން ތަފާތު މަންޒަރެކެވެ. އެއްބަޔަކަށް ކަމުނުދިޔަޔަސް ގިނަބަޔަކަށް ބަލާލަން ހިތްގައިމުވި ކުލަ ރީތި ފޮޓޯއެކެވެ. ޤައުމުގެ ކުރިމަގު ކުރަހާލަދިން ތަފާތު ތަސްވީރެކެވެ. ހަމަ ތަފާތު ފޮޓޯއެކެވެ.
