ނަޕޯލީއަށް ކުޅެމުންއައި ކަލީޑޯ ކުލިބަލީގެ ސޮއި ޗެލްސީން ހޯދައިފިއެވެ.
ކުލިބަލީ ޗެލްސީއާ ގުޅުނީ 40 މިލިއަން ޔޫރޯގެ އަގަކަށެވެ. އުމުރުން 31 އަހަރުގެ ސެނެގާލް ޑިފެންޑަރު ޗެލްސީއާއެކު ހަދާފައިވަނީ ހަތަރު އަހަރުގެ އެއްބަސްވުމެކެވެ. އޭނާ ވަނީ މިހާރު ލަސް ވެގާސްގައި ޓީމުގެ ކުޅުންތެރިނާއެކު ފަރިތަކުރުންތަކުގައި ބައިވެރިވާންފަށާފައެވެ.
މި ދަނޑިވަޅުގައި ކުލިބަލީ ޗެލްސީއާ ގުޅުމަކީ އެޓީމަށް ލިބުނު ވަރަށް ބޮޑު ހިތްހަމަޖެހުމަކަށް ވާނެއެވެ. ޓީމުގެ ކޯޗު ޓުޗެލް މީގެ ކުރިންވެސް ވަނީ މިހާރު ޓީމަށް އެންމެ މުހިންމީ ޑިފެންސްލައިންގައި ކުޅޭނެ ރަނގަޅު ކުޅުންތެރިން ހޯދުންކަން ފާހަގަކޮށްފައެވެ. މިދިޔަ ސީޒަންގައި ޗެލްސީގެ ފަހަތް ބެލެހެއްޓި އެންޓޯނިއޯ ރުޑިގާއާއި އަންދްރޭސް ކްރިސްޓެންސަން ޓީމު ދޫކޮށްލުމުން ޗެލްސީން އޮތީ ރަނގަޅު ޑިފެންޑަރަކަށް ވަރަށް ބޮޑަށް ބޭނުންވެފައެވެ.
ނަޕޯލީގައި ކުލިބަލީ ވަނީ 317 މެޗު ކުޅެދީ 14 ލަނޑު އެޓީމަށް ޖަހައިދީފައެވެ. ފްރާންސްގެ މެޓްޒްއިން ކެރިއަރު ފެށި ކުލިބަލީ ވަނީ ދެ ސީޒަންގައި ބެލްޖިއަމްގެ ގެންކަށްވެސް ކުޅެފައެވެ.
ޗެލްސީގައި ކުލިބަލީއާއެކު ގައުމީ ޓީމުގެ ކީޕަރު އެޑުއާޑް މެންޑީ ހުރުމަކީ އޭނާއަށް ލިބޭނެ އިތުރު ހިތްވަރެކެވެ. ކުލިބަލީއަކީ ސެނެގާލް ގައުމީ ޓީމުގެ ކެޕްޓަނެވެ. މިއަހަރު އޮތް އެފްރިކަން ކަޕްގެ ތަށި ކުލިބަލީ ވަނީ އޭނާގެ ކެޕްޓަންކަމުގެ ދަށުގައި ސެނެގާލްއަށް ހޯދައިދީފައެވެ.
