ސަރުކާރު ވައްޓާލުމަށް ރާވާކަމުގެ ތުހުމަތުގައި ހައްޔަރުކޮށްފައިވާ ކާނަލް ނާޒިމްގެ ކޮއްކޮ އާދަމް އާޒިމް އެއްވެސް ޝަރުތަކާއި ނުލައި ވަގުތުން ދޫކޮށްލުމަށް އެމްނެސްޓީ އިންޓަނޭޝަނަލުން ގޮވާލައިފިއެވެ.

އިންސާނީ ހައްގުތަކާއި ބެހޭ ބައިނަލްއަގުވާމީ ޖަމިއްޔާ އެމްނެސްޓީން އަންގާރަ ދުވަހު ނެރެފައިވާ ބަޔާނުގައި ބުނެފައިވަނީ، އާޒިމް ހައްޔަރުކުރި ކުރުމަކީ އިދިކޮޅު ފަރާތްތަކުން ކުރަމުންދާ މަސައްކަތަށް ދިން ހަމަލާއެއްކަމަށެެވެ.

ފާއިތުވެ މިދިޔަ މަސްތަކުގައި ގާތްގާތުގައި އިދިކޮޅު އިސްފަރާތްތަކަށް ސަރުކާރުން އެކި ނަންނަމުގައި ސިޔާސީ ދައުވާތައްކޮށް، އެކިކަހަލަ ތުހުމަތުތައް ކުރަމުންގޮސްފައިވާކަން އެ ޖަމިއްޔާއިން ވަނީ ފާހަގަކޮށްފައެވެ.

އެޖަމިއްޔާއިން ދެކޭ ގޮތުގައި، އާޒިމް އަށް ސަރުކާރުން ސީދާ ޓާގެޓް ކުރީ ކަމަށާއި، އޭނާއަކީ މި ފަހަކަށް އައިސް ހައްޔަރުކޮށްފައިވާ އޭނާގެ ބޭބެ ނާޒިމްއާއި، އަދި އެހެނިހެންވެސް ސިޔާސީ ކަންކަމުގައި ފަސްޖެހުމެއެްނެތި އަޑުއުފުލާ އިދިކޮޅު ލީޑަރެއް ކަމަށް އެ ޖަމްއިއްޔާއިން ދެކޭ ކަމަށްވެސް ބަޔާނުގައި ވެއެވެ.

އާޒިމް ހައްޔަރުކޮށްފައިވަނީ އިދިކޮޅު އެމްޔޫއޯގެ ލީޑަރޝިޕްގެ ބޭފުޅުންނާއި ރައީސް ނަޝީދު ހިމެނޭގޮތުން ބޭރުގެ ގައުމުތަކާއި އެކު ރާއްޖޭގެ ސިޔާސީ މަޝްރަހާއި ގުޅޭގޮތުން ބޭއްވި މަޝްވަރާ ބައްދަލުވުންތަކަށްފަހު މާލެ ވަޑައިގެންނެވި ފަހުންނެވެ.

އާދަމް އާޒިމް ހައްޔަރުކޮށްގެން ފުލުހުންގެ ބެލުމުގެ ދަށަށް ގެންގޮސްފައިވަނީ، މިމަހުގެ 8 ވަނަ ދުވަހުގެ ހެނދުނު އޭނާގެ ގެއިން ނުކުމެވަޑައިގަންނަވަނިކޮންނެވެ.

އާޒިމް ހައްޔަރުކުރުމަށް ނެރެފައިވާ ކޯޓު އަމުރުގައި ބުނެފައިވަނީ، އާޒިމް ހައްޔަރުކުރަނީ، ދިވެހިރާއްޖޭގައި ޤާނޫނީ ގޮތުން އުފެދިފައިވާ ސަރުކާރު ޤާނޫނާއި ޚިލާފަށް ސަރުކާރު ބަދަލުކުރުމަށް ހިތްވަރު ލިބޭގޮތަށް ވާހަކަ ދައްކައި، ދިވެހިރާއްޖޭގެ ޝަރުޢީ ނިޒާމާއި މެދު ރައްޔިތުންގެ ހިތުގައި ނަފުރަތު އުފައްދާ، އިތުބާރު ގެއްލުވާލުމަށް މަސައްކަތްކޮށް، ދޮގު މަޢުލޫމާތު ފަތުރައި، ތަފާތު އެކި ގޮތްގޮތަށް ވާހަކަ ދައްކާފައިވާކަމަށް ތުޙުމަތު ކުރެވޭތީ ކަމަށެވެ. އަދި ހަމަ މިއާއިއެކު، މި މައްސަލައިގެ ހެއްކައް ނުފޫޒު ފޯރުވައި ހެކި ފޮރުވުމަށް އާޒިމް މަސައްކަތް ކޮށްފާނެ ކަމަށް ބެލެވޭ ކަމަށާ، އާޒިމް މުޖުތަމަޢުގެ ތެރެއަށް ދޫކޮށްލާފައި ބެހެއްޓުމަކީ އޭނާގެ ފަރާތުން މުޖުތަމަޢުގެ ސަލާމަތަށް ނުރައްކާ ވެދާނެ ކަމެއް ކަމަށް ފެންނަ ކަމަށްވެސް ކޯޓު އަމުރުގައި ވެއެވެ.

ފުލުހުންގެ އިންޓެލް ރިޕޯޓެއްގެ މައްޗަށް ބިނާކޮށް އެއްވެސް މީހަކު ހައްޔަރު ނުކުރެވޭނެކަމަށް އާޒިމްގެ ވަކީލުން ގެންދަވަނީ ވިދާޅުވަމުންނެވެ.

އާޒިމްގެ މައްޗަށް ކޮށްފައިވާ ގާނޫނީ ސަރުކާރު ވަށްޓާލަން ރާވާކަމުގެ ތުހުމަތު އޭނާގެ މައްޗަށް ސާބިތުވެއްޖެނަމަ، ގާނޫނުލްއުގޫބާތުގެ 532  533 އަދި 610 ވަނަ މާއްދާގެ ދަށުން 17 އަހަރުގެ ޖަލުހުކުމެއް އަންނާނެއެވެ.

އާޒިމްގެ މައްޗަށްކޮށްފައިވާ އަސްލެއްނެތް ތުހުމަތުތައް އަނބުރާ ގެންގޮސް އޭނާ ވަގުތުން މިނިވަންކުރުމަށް އެމްނެސްޓީން ވަނީ ދިވެހި ސަރުކާރަށް ގޮވާލާފައެވެ.