މި މަހު ރާއްޖޭގައި ބޭއްވުމަށް ހަމަޖެހިފައިވާ 54 ވަނަ އޭޝިއަން ބޮޑީބިލްޑިން އެންޑް ފިޒީކް ޗެމްޕިއަންޝިޕްގެ ރަސްމީ ލޯގޯ ލޯންޗްކޮށްފިއެވެ.

ލޯގޯ ލޯންޗު ކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވީ ރާއްޖޭގެ ކުޅިވަރާއި ބެހޭ ވަޒީރު އަހުމަދު މަހްލޫފުއެވެ. މުބާރާތުގައި ރާއްޖޭގެ ވިއްސަކަށް އެތުލީޓުން ބައިވެރިވާނެއެވެ. ތަފާތު އެކި ގައުމުތަކުން ގާތްގަނޑަކަށް 500އަށްވުރެ ގިނަ އެތުލީޓުން މި މުބާރާތުގައި ބައިވެރިވާނެކަމަށް ބޮޑީބިލްޑިން އެސޯސިއޭޝަން (ބީބީއޭއެމް) އިން މައުލޫމާތުދެއެވެ. މި މުބާރާތް އޮންނާނީ މި މަހުގެ 15ން 21އަށް ކ. މާފުށީގައެވެ.

މިއީ މިހާތަނަށް ރާއްޖޭގައި ބާއްވާ އެންމެ ފުރަތަމަ އޭޝިއަން ބޮޑީބިލްޑިންގ އެންޑް ފިޒިކް ޗެމްޕިއަންޝިޕްއެވެ. މުބާރާތް އިންތިޒާމުކުރަނީ އޭޝިއާ ބޮޑީބިލްޑިންގ ފެޑަރޭޝަން އިންނެވެ.

މިއީ މިއަހަރު ރާއްޖޭގައި ބާއްވާ ތިންވަނަ ބައިނަލްއަގްވާމީ މުބާރާތެވެ. މީގެ ކުރިން ވަނީ ސައުތު އޭޝިޔަން ޖޫނިއަރ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕާއި ވެސްޓަރން އޭޝިއަން ޖޫނިއަރ ޗެސް ޗެމްޕިއަންޝިޕް ރާއްޖޭގައި ބާއްވާފައެވެ. މީގެ އިތުރުންވެސް ބައިނަލްއަގްވާމީ ގިނަ މުބާރާތްތަކެއް މިއަހަރު ރާއްޖޭގައި ބޭއްވުމަށް ހަމަޖެހިފައިވެއެވެ.